Azərbaycan diplomatı bu müsahibədə litvalı turistlərin şirnikləndirilərək Dağlıq Qarabağa səfərə aparılmasının qəbuledilməzliyi, hərbi münaqişəsi zonasında həqiqi vəziyyət barədə məlumat verilib.

Səfir H.Məmmədzadə qeyd edir ki, Ermənistan öz daxili problemləri ilə məşğul olmaq əvəzinə, Azərbaycanın işğal edilmiş əraziləri ilə bağlı münaqişəni qızışdırır. Dağlıq Qarabağ problemi ilə bağlı ritorika insanların diqqətini gündəlik qayğılardan yayındırmaq üçü yaradılıb.

Həsən Məmmədzadə vurğulayıb ki, Ermənistan Prezidentinin guya Dağlıq Qarabağın Ermənistana mənsub olması barədə cəfəng, beynəlxalq aləmdə əhəmiyyət verilməyən bəyanatlarına baxmayaraq, beynəlxalq birliyin üzvlərinin əksəriyyəti, o cümlədən Litva da Azərbaycanın ərazi bütövlüyünü qətiyyətlə dəstəkləyir.

Səfir Həsən Məmmədzadə diqqətə çatdırıb ki, Azərbaycan həmişə bu münaqişənin diplomatik vasitələrlə həllinə çalışıb, lakin müharibə təhlükəsi yaranarsa biz münaqişənin hərbi yolla həllindən çəkinmirik. Səfir vurğulayıb ki, bizim yerimizə dünyanın hər hansı başqa dövləti olsaydı, o da belə hərəkət edərdi.

Litva KİV-lərində Dağlıq Qarabağa səfər etməyə səsləyən maraqlı məqalələr dərc olunmasını şərh edən Həsən Məmmədzadə soruşur: Hərbi əməliyyatlar zonasında hansı turizmdən söhbət ola bilər. Belə səyahətlər həm təhlükəli, həm də qanunsuzdur. Səfir izah edib ki, Azərbaycanın işğal edilmiş ərazilərinə səfər beynəlxalq hüquq normalarını pozur. Azərbaycan dövlətinin sərhədlərini qanunsuz keçən hər kəs cinayət məsuliyyəti daşıyır. Belə “səyahətləri” təşviq edənlər isə sadəcə, Litva cəmiyyətini aldadır.

Səfir H.Məmmədzadə əminliklə bildirir ki, bəzi “kəskin duyğu həvəskarları”nın bu cür hərəkətləri Litva ilə Azərbaycanın dostluq münasibətlərini korlaya bilməyəcək. Litva Azərbaycanın ərazi bütövlüyünü tanıyır və ona hörmət edir, Azərbaycan da Litvanın bu qətiyyətli və ardıcıl mövqeyini alqışlayır.