Tanınmış alim arxiv materiallarına və rəsmi sənədlərə istinad edərək Birinci Dünya müharibəsi dövründə ermənilərin Osmanlı dövlətinə qarşı amansız üsyanlar qaldırdıqlarını diqqətə çatdırıb. O deyib ki, ölkənin demək olar əksər bölgələrində tüğyan edən mövcud erməni üsyanları ilə yanaşı, yeni-yeni üsyan təhdidləri də ortaya çıxırdı. Bütün bunlar xarici qüvvələrin təhriki və yardımı ilə Osmanlı ordusunu zəiflətmək məqsədi daşıyırdı. Erməni silahlılarının dinc türk-müsəlman əhaliyə divan tutduğunu bildirən C.Makkarti bildirib ki, o dövrdə aparılan axtarışlar nəticəsində Harputda 5000, Gürgün qəzasında 1221, Kayseridə 1600, Dəvəlidə 265 döyüş tüfəngi və tapança olmaqla ermənilərdən külli miqdarda silah və sursat aşkarlanıb. Ermənilərin qaldırdıqları üsyanların hətta Osmanlının İzmit, İzmir kimi şəhərlərində də baş verməsi və onlara məxsus cəbbəxanaların bu ərazilərdə də aşkarlanması bir daha təsdiq edir ki, ermənilər yaşadıqları Osmanlı dövlətinə qarşı xəyanət edib və döyüşən tərəf olublar. Bütün bunlar isə “erməni soyqırımı” iddiasının əsassız və uydurma olduğunu sübut edir.

Mövzu ilə bağlı, o cümlədən Azərbaycan ərazisinin 20 faizinin təcavüzkar Ermənistan tərəfindən işğal edilməsinə dair sualları cavablandıran amerikalı professor deyib: “Tarixin bütün dövrlərində ermənilər əsassız iddialarla yaşayıblar və həmişə də nəticə onların ziyanına olub. O cümlədən onların Dağlıq Qarabağa qarşı iddiaları tam əsassızdır. XX əsrin əvvəllərində ermənilər dünyanın heç bir bölgəsində əhalinin üçdə birindən çoxunu təşkil etməyiblər. Sonradan silahlı dəstələrlə Qafqaza doğru çəkilib orada ağır cinayətlər törədiblər. Onlar heç zaman çoxluq təşkil etmədikləri Trabzona da iddia edirlər. Göründüyü kimi, əsassız iddialar ermənilərin xislətindən irəli gəlir”.

 Konfransda Azərbaycanın Qarsdakı baş konsulu Ayxan Süleymanlı, Türkiyənin dövlət rəsmiləri, görkəmli alimlər, KİV təmsilçiləri iştirak ediblər. (Azərtac)