İclası giriş sözü ilə açan Qərbi Azərbaycan İcmasının Ziyalılar Şurasının sədri, professor Elxan Hüseynov 2026-cı ilin ilk yarımilliyi ərzində həyata keçirilən fəaliyyət, görülmüş işlər və əldə olunmuş nəticələr barədə ətraflı hesabat təqdim edib. O, Ziyalılar Şurasının Qərbi Azərbaycanın tarixi, mədəni irsi və həqiqətlərinin elmi əsaslarla araşdırılması, təbliği və beynəlxalq ictimaiyyətə çatdırılması istiqamətində həyata keçirdiyi layihələrdən bəhs edib, qarşıdakı dövr üçün müəyyən edilmiş prioritet istiqamətləri diqqətə çatdırıb.

Daha sonra Şura üzvləri hesabat dövründə görülmüş işləri yüksək qiymətləndirərək, Ziyalılar Şurasının fəaliyyətinin daha da təkmilləşdirilməsi, elmi potensialın səfərbər olunması və Qərbi Azərbaycan həqiqətlərinin geniş təbliği istiqamətində fikir və təkliflərini səsləndiriblər.

Qərbi Azərbaycan İcmasının Ziyalılar Şurasının sədr müavini, professor Fərrux Rüstəmov çıxışında hesabat dövründə elm və təhsil sahəsində görülən işləri dəyərləndirib. O, Qərbi Azərbaycan mövzusunun elmi müstəvidə daha geniş araşdırılmasının, bu istiqamətdə yeni tədqiqatların hazırlanmasının və gənc alimlərin prosesə cəlb edilməsinin əhəmiyyətini vurğulayıb.

Azərbaycan Dillər Universitetinin kafedra müdiri, Azərbaycan Dillər Universitetində Qərbi Azərbaycan Araşdırmalar Mərkəzinin rəhbəri Həqiqət Hacıyeva çıxışında yeni yaradılmış Qərbi Azərbaycan Araşdırmalar Mərkəzinin qarşısında duran əsas məqsədlər və perspektiv fəaliyyət istiqamətləri barədə məlumat verib. O, Qərbi Azərbaycan həqiqətlərinin elmi əsaslarla araşdırılması, xarici dillərdə təbliği, beynəlxalq akademik əməkdaşlığın genişləndirilməsi və bu istiqamətdə yeni elmi layihələrin həyata keçirilməsinin əhəmiyyətini vurğulayıb.

Qərbi Azərbaycan İcmasının Ziyalılar Şurasının üzvü, Prezident təqaüdçüsü, publisist-tədqiqatçı Şəfəq Nasir çıxışında Qərbi Azərbaycanın tarixi yaddaşının qorunması, deportasiya faktlarının araşdırılması və bu həqiqətlərin cəmiyyətə çatdırılması istiqamətində görülən işlərdən danışıb. O, publisistik fəaliyyətin bu istiqamətdə maarifləndirmə baxımından mühüm rol oynadığını bildirib.

Qərbi Azərbaycan İcmasının Ziyalılar Şurasının üzvü, şair, publisist, folklorşünas alim, filologiya elmləri doktoru, professor, Əməkdar jurnalist Avtandil Məmmədov Qərbi Azərbaycanın zəngin folklor irsinin qorunması və gələcək nəsillərə ötürülməsi istiqamətində görülən işlərdən bəhs edib. O, milli-mənəvi irsin yaşadılması və ədəbi-mədəni irsin təbliğinin Ziyalılar Şurasının fəaliyyətində mühüm yer tutduğunu vurğulayıb.

Qərbi Azərbaycan İcmasının Ziyalılar Şurasının üzvü, Bakı Dövlət Universitetinin İqtisadiyyat kafedrasının müdiri, professor, iqtisad elmləri doktoru Vahid Abbasov çıxışında Qərbi Azərbaycan mövzusunun elmi tədqiqatlarda daha geniş yer almasının, bu istiqamətdə akademik əməkdaşlığın gücləndirilməsinin və ziyalıların intellektual potensialından səmərəli istifadə edilməsinin vacibliyini vurğulayıb. O, iqtisadi və sosial aspektlər üzrə elmi araşdırmaların genişləndirilməsinin Qərbi Azərbaycan həqiqətlərinin daha dolğun şəkildə öyrənilməsinə və təbliğinə töhfə verəcəyini bildirib.

Qərbi Azərbaycan İcmasının Ziyalılar Şurasının üzvü, Yeni Azərbaycan Partiyası Yasamal rayon təşkilatının sədri, tarix elmləri namizədi, dosent Bəxtiyar Nəbiyev çıxışında Qərbi Azərbaycan həqiqətlərinin ictimai-siyasi müstəvidə daha geniş təbliğinin vacibliyini qeyd edib. O, tarixi faktların elmi əsaslarla cəmiyyətə çatdırılması, gənclər arasında maarifləndirmə işinin genişləndirilməsi və bu istiqamətdə birgə fəaliyyətin davam etdirilməsinin əhəmiyyətini vurğulayıb.

Müzakirələrin yekununda Ziyalılar Şurasının 2026-cı ilin ilk yarımilliyi üzrə fəaliyyəti qənaətbəxş qiymətləndirilib. Bildirilib ki, qarşıdakı dövrdə Şuranın elmi və intellektual potensialından daha səmərəli istifadə olunmalı, Qərbi Azərbaycan həqiqətlərinin elmi əsaslarla araşdırılması və beynəlxalq akademik müstəvidə təbliği daha da genişləndirilməlidir. Bununla yanaşı, gənc tədqiqatçıların bu istiqamətdə fəaliyyətə cəlb edilməsi, yeni elmi nəşrlərin hazırlanması, beynəlxalq və respublika səviyyəli konfransların təşkili, eləcə də maarifləndirici layihələrin həyata keçirilməsi ilə bağlı təkliflər səsləndirilib.