Yaxın Şərqdə mövcud münaqişənin eskalasiyası dünya ölkələri üçün getdikcə daha hiss olunan humanitar və iqtisadi mənfi təsirlər yaradır. Fact-info.az xəbər verir ki, bu barədə Birləşmiş Millətlər Təşkilatı strukturları xəbərdarlıq edib.

Qeyd olunur ki, vəziyyətin gərginləşməsi fonunda neftin qiymətləri sürətlə artır. Bunlarda əsas amil qlobal enerji ticarətinin mühüm arteriyalarından biri olan Hörmüz boğazı vasitəsilə yükdaşımaların azalmasıdır.

BMT-nin məlumatına görə, neftin bahalaşması zəncirvari reaksiyaya səbəb olur, xüsusilə də enerji daşıyıcılarını idxal edən ölkələrdə nəqliyyat, elektrik enerjisi və kənd təsərrüfatı resurslarının xərcləri artır. Hərbi risklər səbəbindən logistika pozuntuları və sığorta haqlarının artması əlavə təzyiq yaradır.

Ümumdünya Ərzaq Proqramı qlobal ərzaq təchizatı zəncirlərində ciddi pozuntular barədə xəbərdarlıq edir. Proqnoza görə, böhran uzanacağı təqdirdə 45 milyonadək insan kəskin aclıq həddinə çata bilər.

BMT-nin Ticarət və İnkişaf üzrə Konfransının məlumatına əsasən, Hörmüz boğazı vasitəsilə dəniz daşımalarının azalması inkişaf etməkdə olan iqtisadiyyatlara təzyiqi artırır. Qeyri-müəyyənlik fonunda investorlar kapitalı çıxarır, bu isə milli valyutaların zəifləməsinə və borclanma dəyərinin artmasına səbəb olur.

Regionda humanitar vəziyyət də pisləşməkdə davam edir. Ümumdünya Səhiyyə Təşkilatı təhlükəsizliklə bağlı baş vermiş insident səbəbindən Qəzza sektorundan Misirə “Rəfah” keçid məntəqəsi vasitəsilə tibbi evakuasiyanın dayandırıldığını bildirib.

Livanda səhiyyə sistemi kritik yüklənmə ilə üzləşib. Belə ki, martın əvvəlindən etibarən tibb müəssisələri və personalına 92 hücum qeydə alınıb, nəticədə 53 nəfər həlak olub, daha 137 nəfər yaralanıb. Bir sıra xəstəxanalarda təcili müraciətlərin sayı üç dəfə artıb, bəzi tibb müəssisələri isə məcburən bağlanıb.