Hazırda dünyada münaqişələr genişlənir, yeni müharibə ocaqları yaranır. Təhlükəsizlik bəşəriyyət üçün ciddi məsələyə çevrilir. Belə məqamda ölkəmizdə sabitlik, təhlükəsizlik hökm sürür. Azərbaycan dünyanın ən sabit regionlarından birinə çevrilib. Təbii ki, bu sabitlik, dinc quruculuq prosesi uzun illərin böyük zəhməti hesabına başa gəlib. Bu torpaq uğrunda minlərlə qəhrəman əsgərlərimiz canından keçiblər. Biz şəhidlərimizi ehtiramla anmaqla bərabər, onların ailələrini, həmçinin qazilərimizi diqqətdə saxlayırıq.  

 Azərbaycan Respublikasının Prezidenti, Silahlı Qüvvələrin Ali Baş Komandanı, cənab İlham Əliyevin rəhbərliyi altında müzəffər Ordumuz doğma torpaqlarımızı 2020-ci ildə, 44 günlük Vətən müharibəsində işğaldan azad etdi. 30 illik əzablarımıza, düşmənin işğalçılıq siyasətinə son qoyuldu.

Bu gün işğaldan azad olunmuş ərazilərimizdə quruculuq prosesi davam edir. Keçmiş məcburi köçkünlər dövlətimizin himayəsilə öz doğma torpaqlarında inşa olunmuş  evlərinə qayıdırlar. Qarabağda, Şərqi Zəngəzurda inşaat işləri sürətlə davam edir. Soydaşlarımız öz tarixi yurd yerlərinə böyük sevinc hissilə dönürlər. Biz Vətəndaş Cəmiyyətinin üzvləri olaraq, həmin bölgələrə mütəmadi olaraq səfərlər edirik, quruculuq prosesini  böyük qürur hissilə müşahidə edirik. Bu torpaqlarda hər addımı atarkən qəhrəman Ordumuzu xatırlayırıq. Şəhidlərimizə Allahdan rəhmət, qazilərimizə şəfalar diləyirik. Ali Baş Komandanın uzaqgörən siyasəti, qətiyyəti, Silahlı Qüvvələrimizinin şücaəti, xalqımızın birliyi nəticəsində torpaqlarımız işğaldan azad oldu. Bu tarixi qələbə daim xalqımızda ruh yüksəkliyi yaradır.

 Artıq soydaşlarımız həmin ərazilərdə bütün bayramları, o cümlədən Novruzu  yüksək əhval-ruhiyyə ilə qeyd edirlər. Novruzla bağlı qısa təəssüratlarımı bildirmək istərdim. Bu bayram Beynəlxalq müstəvidə də tanıdılır. Azərbaycanın Birinci vitse-Prezidenti Mehriban xanım Əliyevanın böyük səyi nəticəsində Novruz bayramı UNESCO tərəfindən Qeyri-Maddi Mədəni İrs siyahısına daxil edilib. İslamdan əvvəl tarixi dövrə təsadüf olunan Novruz bayramı Azərbaycanla yanaşı bütün Şərqdə qeyd olunur. Novruz təkcə türk xalqlarının deyil, ümumilikdə bəşəriyyətin mənəvi dəyəri hesab edilir.

23 fevral 2010-cu ildə BMT Baş Assambleyasının 64-cü sessiyasının iclasında martın 21-i “Beynəlxalq Novruz Günü” elan olunub.

 Onu da qeyd edim ki, Novruz ənənələri incəsənətdə də öz əksini tapmışdır. Xalqımızın sənətkarları Novruz bayramı haqqında mahnılar yazmış, filmlər çəkmişlər. Azərbaycanın görkəmli bəstəkarları müxtəlif mahnılar bəstələmişlər.

Ulu Öndər Heydər Əliyev bu bayramla bağlı deyirdi: “Bu bayram onunla fərqlənir və səciyyələnir ki, bu bayramda siyasi baxışlarından, siyasi dünyagörüşündən asılı olmayaraq hamı bayram  qeyd edir. Amma bayramın bizə bəxş etdiyi ən gözəl nemət ondan ibarətdir ki, qədim zamanlardan bu bayramda insanlar kin-küdurəti unudur, küsülülər barışır, ziddiyyətlər aradan götürülür. Demək, bu, dostluq, həmrəylik, yüksək mənəviyyat bayramıdır.

Ona görə də, Novruz bayramını hər il böyük el bayramı kimi edirik və bu, Azərbaycan vətəndaşlarının əksəriyyətinin arzusudur ki, ölkəmizdə milli həmrəylik, vətəndaş həmrəyliyi, birliyi olsun. Bu ali məqsədləri, ali fikirləri ulu babalarımız bizə nəsihət ediblər. Bu bayram yaranandan onun xüsusiyyətləri insanları həmişə dostluğa, həmrəyliyə, qarşılıqlı anlaşmaya dəvət edibdir”.

 Bu gün bizim üçün çox əlamətdar hadisədir ki, həm dini, həm də milli bayramlarımızı işğaldan azad olunmuş torpaqlarımızda keçiririk. Belə tarixi məqamları sözlə ifadə etmək  çətindir. İnanırıq ki, bir gün gələcək Qərbi Azərbaycanda, Zəngəzurda, digər mahallarımızda,  tarixi yurd yerlərimizdə bu bayramlarımızı qeyd edəcəyik. Elə bir gün mütləq gələcək. Sonda həm Novruz, həm də Ramazan bayramı münasibətilə Ali Baş Komandanı, bütün xalqımızı təbrik edirəm, Allah Azərbaycanı qorusun!                                                                                                                           

Müşfiq Əliyev

 Azərbaycan Respublikası Şəhid Ailələrinə “Qayğı” Cəmiyyətinin sədri,

Qarabağ müharibəsi veteranı, qazi