Mədəniyyət Nazirliyinin tabeliyində fəaliyyət göstərən Azərbaycan Respublikasının Kino Agentliyinin dəstəyi ilə çəkilmiş “Danışır və göstərir Şuşa” filmi oktyabrın 23-də Nizami Kino Mərkəzində təqdim edilib.

Fact-info.az xəbər verir ki, film Şuşa Radio-Televiziya Yayım Stansiyasının fəaliyyəti haqqındadır. Filmin qəhrəmanı stansiyanın sabiq əməkdaşı, mühəndis Fazil Həsənovdur.

"Oskar film production"un istehsalı olan filmin rejissoru Murad Muradov, ssenari müəllifləri Ramil Ələkbərov və Murad Muradov, təsvir rejissoru isə Nadir Mehdiyevdir.

Stansiyanın taleyi Qarabağın, Şuşanın və ümumilikdə Azərbaycanın 60 illik dövründə baş verən hadisələr fonunda cərəyan edir.

Şuşa Radio-Televiziya Yayım Stansiyası 1990-cı ildə yanvar hadisələri zamanı – Dövlət Televiziyasının enerji blokunun partladıldığı dövrdə yeganə televiziya informasiya mənbəyi kimi fəaliyyət göstərib. Filmdə Yayım stansiyasının hazırkı əməkdaşları, həmçinin vaxtilə ora ezam olunmuş jurnalist Bəxtiyar Qaraca, rejissor Əlimürsəl Hüseynov və Şuşa stansiyası ilə əməkdaşlıq etmiş şəxslərdən müsahibələr alınıb. Çəkilişlər Bakıda və Şuşada aparılıb.

Film Mədəniyyət Nazirliyi və Kino Agentliyinin keçirdiyi film layihələri müsabiqəsinin qaliblərindən biridir.

Qeyd edək ki, Nizami Kino Mərkəzində oktyabr–noyabr aylarında Mədəniyyət Nazirliyinin tabeliyində fəaliyyət göstərən Azərbaycan Respublikasının Kino Agentliyinin (ARKA) dəstəyi ilə istehsal olunmuş filmlər təqdim edilir. Filmlərin nümayişində məqsəd Vətən müharibəsinin tarixi əhəmiyyətini, xalqımızın qəhrəmanlıq salnaməsini, həmçinin işğaldan azad edilmiş torpaqlarda aparılan bərpa və quruculuq prosesini ictimaiyyətə çatdırmaqdır. Bu nümayişlər Vətən müharibəsindəki qələbəmizin 5 illiyinə həsr olunur.