Filologiya elmləri doktoru, şərqşünas alim Nəsib Göyüşovun müəllifi olduğu “Nizami Gəncəvi: nur çeşməsi” kitabının təqdimat mərasimi keçirilib.  Tədbirdə tanınmış elm və ədəbiyyat xadimləri iştirak ediblər.

Kitabın müəllifi qeyd edib ki, əsərin yazılmasının məqsədi Nizami Gəncəvinin zəngin isrini təhrifə yol vermədən, onun orijinal fikirlərini və fəlsəfi baxışlarını elmi əsaslarla oxucuya çatdırmaqdır. 

“Sirius yayın evi”nin direktoru Arzu Təbrizli nəşriyyatın ilk nəşrinin Nizami Gəncəvinin ədəbi irsinə hərs etdiyini söyləyərək, söz və fikir ustadının dərin mənəvi, əbədi irsi haqqında uzun illərdən bəri deyilən, yazılan, araşdırılan dəyərli fikirlərə yeni məna qatmaq istədiklərini bildirib.

Mərasimdə şərqşünas alim Əsmətxanım Məmmədova, filologiya elməri doktoru Gülər Abdullabəyova, professor Rəbiyyət Aslanova, Əməkdar incəsənət xadimi Aydın Kazımzadə, fəlsəfə elmləri doktoru Zəkiyyə Babayeva, ilahiyyatçı Ağa Hacıbəyli və başqaları çıxış edərək kitabın məziyyətləri və önəmi haqqında fikirlərini bölüşüblər. Vurğulanıb ki, kitab təkcə Nizami Gəncəvi irsinin dərinliklərini araşdırmaq istəyən ədəbiyyatşünaslar üçün deyil, həm də mənəvi özünüdərkə can atan hər bir oxucu üçün əhəmiyyətli bir qaynaqdır.