Basarkeçər rayonunun Nərimanlı kəndinin əvvəlki adı Hüseynquluağalı olub.  1905-1907-ci illərdə azərbaycanlıların yaşadığı bir çox ərazilərdə, o cümlədən bizim kəndimizdə ermənilər qırğınlar törədiblər. 1918-ci ildə yenə oxşar soyqırımlar törədilib və əhali kənddən çıxarılıb.Yalnız 1921-ci ildə Nəriman Nərimanovun dəstəyi ilə kənd əhalisi yenidən öz tarixi torpaqlarına qayıdır. Əhalinin təşəbbüsü ilə həmin vaxtdan Nərimanlı  kəndinin adı böyük dövlət xadimi olan Nəriman Nərimanovun adı ilə bağlıdır.  Bu fikirləri Fact-info.az-a Qərbi Azərbaycanın Basarkeçər rayonu Nərimanlı kənd icmasının sədri, Tibb Universitetinin müəllimi  Şirazi İbrahimov bildirib.

O, daha sonra əlavə edib:  “Biz oz tarixi torpaqlarımızdan qovulsaq da, Azərbaycanda bu illər ərzində yaşasaq da,  bir an da olsa öz yurd yerlərimizi, doğulduğumuz torpaqlarımızı, həm də ermənilərin vəhşiliklərini unutmadıq.  Onu da qeyd edim ki,  Azərbaycan  Respublikası 2020-ci ilin 44 günlük müharibə nəticəsində tarixi zəfərini qazandı. İşğal altında olan torpaqlarımız, Qarabağımız azad olundu. Artıq bundan sonra bizim Qərbi Azərbaycana qayıdışımız zərurətə çevrildi. Düzdür son 30 ildə dünyaya gələn nəsil o əraziləri görməyib. Lakin hər bir azərbaycanlının Qərbi Azərbaycan qəlbində, ruhunda yaşayır. Bütün bu amillər və Azərbaycan dövlətinin qüdrətlənməsi bizim Qərbi Azərbaycana qayıdışımıza yollar açır, imkanlar yaradır”.

Qeyd edək ki, həm I Qarabağ müharibəsində, həm də  44 günlük  Vətən müharibəsində, qələbəmizin qazanılmasında Nərimanlı kəndinin yetirmələri böyük şücaət göstərib. Bu barədə Şirazi İbrahimov  fikirlərini davam etdirir:“Azərbaycanın ərazi bütövlüyü və suverenliyinin təmin olunması üçün I Qarabağ müharibəsində, 44 günlük Vətən müharibəsində iştirak edən, öz sahəsində fəaliyyəti ilə dövlətçiliyin daha da güclənməsinə töhfə verən, böyük uğurlar qazanan soydaşlarımız var. I Qarabağ müharibəsində Nərimanlıdan 92 nəfər iştirak edib, onlardan 19-u şəhidlik zirvəsinə ucalıb, o cümlədən şəhid Şövqiyar Abdullayev Azərbaycanın Milli Qəhrəmanı adına layiq görülüb. Vətən müharibəsində isə 78 bizim həmyerlimiz iştirak edib, onlardan üç nəfər şəhid olub. Müharibədə iştirak edən qəhrəmanlıq nümunəsi göstərən Nərimanlı kənd sakinlərindən xeylisi  müxtəlif orden və medallarla təltif olundular”.

 İcma sədri onu da bildirdi: “Göyçə mahalı, Basarkeçər rayonu, Nərimanlı kəndinin  yetirmələri Azərbaycanın elm və təhsil sahəsində böyük töhfələr verirlər. Hazırda Nərimanlının yetirməsi olan 1 akademik, 10 elmlər doktoru, professor,  xeyli sayda fəlsəfə doktoru,  dissertant  fəaliyyət göstərir. Bu gün biz bir çox sahələrdə geniş töhfələr veririk. Amma hər birimizin hədəfimiz o tarixi torpaqlarımıza, Qərbi Azərbaycana qayıtmaqdır. Biz bu istiqamətdə davamlı olaraq çalışırıq”.

Fact-info.az