Respublika Gənclər Kitabxanasında görkəmli yazıçı, şair və tərcüməçi Əlibala Hacızadənin 90 illiyi münasibətilə biblioqrafik icmal hazırlanıb.

Kitabxanadan Fact-info.az-a bildirilib ki, vəsaitdə yazıçının həyat və yaradıcılığı, layiq görüldüyü mükafatlar, müəllifi olduğu əsərlər haqqında məlumat verilib.

İcmalda yer alan rəsmi sənədlər hissəsində “Azərbaycan Respublikası Prezidentinin fərdi təqaüdlərinin verilməsi haqqında Azərbaycan Respublikası Prezidentinin Sərəncamı”nın, tənqidçi Vaqif Yusiflinin “Sevməsən, sevilməzsən” və yazıçı Camal Zeynaloğlunun “Özünə əbədi ədəbi abidə ucaltmış insan” adlı məqalələrin tam mətni təqdim edilib. Həmçinin materialda bir sıra görkəmli şəxslərin ədib haqqında söylədikləri dəyərli fikirlər, Əlibala Hacızadənin müəllifi olduğu, redaktə və tərcümə etdiyi “Seçilmiş əsərləri”nin cildləri, “Məhəbbət olmayan evdə”, “Sonuncu mahnı”, “Saib Təbrizi və farsdilli poeziyada Hind üslubu”, “Xəstəlik düşüncədən başlayır: satirik hekayələr, şerlər və detektiv”, “Cənubi Azərbaycan ədəbiyyatının yeni inkişaf mərhələsi” kimi 20-dən çox kitabın biblioqrafik təsviri, qısa icmalı, müəllifi olduğu və haqqında yazılan dövrü mətbuat nümunələrinin siyahısı yer alıb.

Biblioqrafik icmal kitabxananın rəsmi saytında https://www.ryl.az/funds/biblioqrafik-icmal yerləşdirilib.