Fədakarlığın nəhayəti Şəhidlik zirvəsidir. O elə bir zirvədir ki, onu təsvir etməkdə dillər acizdir. Qurani-Kərim şəhidlərin ölmədiyini, diri qaldıqlarını buyurur. Şəhidin ilk qan damlası yerə düşməmişdən öncə bütün günahları bağışlanar, ölüm ona çox rahat gələr, misilsiz bir xoşbəxtlik hissi keçirər. 

 Şəhidlərimiz ölümə qalib gəlməklə bir ilahi həqiqəti təsdiqlədilər. Bu ilahi həqiqət Azərbaycanın yenilməz, mübariz xalq olduğunu, Şəhidlik zirvəsinə ucalan övladlarının şücaəti, oğul itkisinə mətanətlə dözən müqəddəs anaların dəyanətini təsdiq etdi. 

Kamilov Mübariz  İbadət oğlu 1987-ci ilin  may ayının 29-da  Xəzər rayonunun Qala  qəsəbəsində doğulub. 185 saylı məktəbdə təhsil alıb. Orta məktəbi bitirdikdən sonra  diş texniki üzrə təhsil alır. Bu peşəyə yiyələnmək məqsədilə davamlı kurslarda iştirak edib. Daha sonra əsgəri xidmətə çağrılıb. Naxçıvanda həqiqi hərbi xidmətdə olub. Məsuliyyətli, peşəkar hərbçi olan  Kamilov Mübariz hər zaman hərbi hissə komandirlərinin, hərbi xidmət yoldaşlarının rəğbətini qazanıb. Qüsursuz xidmət keçən  Mübariz hərbi tapşırıqları yerinə yetirən zaman düşmənin basdırdığı tank əleyhinə minaya düşərək şəhid olub.  2007-ci ildə  doğulub boya başa çatdığı Qala  qəsəbəsində dəfn olunub. Mübariz Kamilov Vətənə, torpağa bağlı  hərbçi, millətini sevən insan olaraq,  hər zaman onu tanıyanların qəlbində yaşayacaq.

O, orta məktəb illərindən xüsusi olaraq seçilib. Təhsilə marağı, davamiyyəti, insanlara, elə-obaya, torpağa  sevgisi onu  hər zaman fərqləndirib. Valideynlərinin verdiyi məlumatlara görə, onun belə yüksək davranışları həm orta məktəb illərində, həm də hərbi xidmət keçdiyi dövrdə dostları və digər insanlar tərəfindən yüksək dəyərləndirilib.

Kamilov Mübariz hərbi xidməti başa vurmağına sayılı günlər qalan zaman Şəhidlik zirvəsinə yüksəlib. Məkanı cənnət olsun. O, Azərbaycanın tarixində, taleyində şərəfli  yer tutan qəhrəman olaraq hər zaman rəhmətlə, ehtiramla anılacaq.  Sonda bir vacib məqamı qeyd edək ki, çox qəddar düşmən üzərində qazandığımız tarixi Zəfərə,  son 200 illik işğala son qoyub, bizə qələbə sevincini yaşatdığına, millət olaraq bizi  bütövləşdirdiyinə görə, Şəhidlərimizə hər zaman borcluyuq! 

Onu da qeyd edək ki, bu gün Mübarizin məzarı başına yaxınları gəlmişdi. Onlar şəhidimizi anaraq ruhuna dualar oxudular.

İndi isə şəhid Kamilov Mübariz İbadət oğluna həsr olunan filmi təqdim edirik.

Fact-info.az