Vətən müharibəsində qəhrəmancasına döyüşüb şəhidlik zirvəsinə yüksələn əsgərlərimizdən biri də Zahiddir. Bu gün üzündə tanrı təbəssümü, qəlbində Vətən sevgisi yaşadan şəhid Zahid Zairlinin doğum günüdür. Zahid Azad oğlu Zairli 10 may 2000-ci ildə Yardımlı rayonunun Dəlləkli kəndində anadan olub. Dəlləkli kənd tam orta məktəbini bitirən Zahid 2015-2019-cu illərdə Azərbaycan Memarlıq və İnşaat Universitetinin (AzMİU) nəzdində İnşaat Kollecində təhsil alıb. Təhsilini bitirdikdən sonra, 2019-cu ildə hərbi xidmətə gedib. Zahid əsgərlər arasında keçirilən seçim müsabiqələrini uğurla tamamlayıb və XTQ-yə seçilən 25 əsgərdən biri olub. Arzusunda olduğu snayperçi kimi təlimlərə qatılıb.

Şəhidimizin atası Azad kişi deyir ki, Zahid 2019-cu ildə hərbi xidmətə gedib. O, andiçmədən sonra Xüsusi Təyinatlılarda xidmətini davam etdirib. Aktivliyinə görə, qısa müddətdə baş snayperçi olub. Sonradan Tovuz döyüşlərində də iştirak edib. Atəşkəs olunduğu zaman yenidən təlimlərə başlayıb. Hətta gərgin təlim zamanı  evlə əlaqə saxlaması çətin olurdu. 27 sentyabrda II Qarabağ müharibəsi başladı. Döyüşlərə qatılan Zahid Murovdağ, Hadrut, Füzuli və Cəbrayılın düşməndən azad olunmasında yaxından iştirak edib.

Şəhidimizin atası onu da əlavə etdi:”Döyüş yoldaşlarının dediyinə görə, Cəbrayılda "vişka" deyilən ərazi var. Həmin məntəqə düşmənin əlində olub..   Bu vaxt Zahid postun yanındakı  təpədə mövqe tutubmuş. Zahid izlənilirdi. O, istəyirdi ki, mövqeyini dəyişsin, həmin vaxt düşmən ardı kəsilmədən əsgərlərimizə doğru atəş açıb. 8 nəfər muhasirədən çıxıb. Ordakı post alınan zaman, Zahid düşməndən açılan snayper gülləsi ilə vurulub. Evə gəlməyinə 85 gün qalmış oğlum şəhid oldu. İndi oturmuşam onun ev muzeyində. Onun 4-cü sinifdə hərbi salam verdiyi şəklinə baxıram. O, uşaqlıqdan  döyüşə, şəhidliyə hazır idi”.

Şəhidimizin döyüş yoldaşı Xaliq Şükürov  şəhidimizlə bağlı xatirələrini bölüşür: “Mən Zahiddən üç ay kiçik çağrışçıydım. O vaxt hələ müharibə başlamamışdı.  Hərbi hissədə Zahid mənə böyük qardaş kimi dəstək olurdu. O, elə bir insan idi ki, son tikəsini dostlarla, əsgər yoldaşları ilə bölüşürdü. Yüksək insani keyfiyyətləri ilə bərabər, təlimlərdə də cəngəvər kimi iştirak edirdi. Mən deyərdim o, peşəkar snayperçi idi. O, uzaq məsafəyə siqaret dənəsi qoyub onu çox dəqiqliklə vururdu. Sonradan 44 günlük müharibə başladı. Döyüşlər zamanı Zahid eyni peşəkarlığı göstərirdi. Təbii ki, Zahid Zairlinin  döyüş bacarığı hər kəsə ruh verirdi. O, hər dəfə snayperlə vuranda ucadan qışqırırdı. Biz dərhal bilirdik ki, Zahidin atəşə hədəfə dəyib, yəni düşməni məhv edib. Sonradan mən yaralandım, yaddaşımda problemlər yarandı. Məhz ona görə, zəruri döyüş anlarını  yaxşı xatırlaya bilmirəm”.

 Onu da qeyd edək ki, Şəhidimizlə bağlı maraqlı videolarla rastlaşdıq. Zahid Azad oğlunun komandiri danışır:

 - "3 gün idi, ac-susuz idik. Yarpaqların üstünə düşən şeh damcılarını içirdik. Zahidlə bərabər 6 nəfər idik. Oturub, gözləyirdik. O qədər çətinliklərə rəğmən Zahid daha da irəliyə getməyə, can atırdı və deyirdi; "Geri, dönüş yoxdur, ya irəliyə gedib, ermənilərin kökünü kəsib, qalib olacağıq, ya da Şəhid". Sərras atırdı, atdığını da vururdu və deyirdi; -"Komandir! Sən birini vursan, mən ikisini vuracam". -Cəsur və qorxmaz idi”.

Gerçəkdən şəhidlik adi ölüm deyil, Vətən, torpaq, böyük amallar uğrunda candan keçmək, özünü şüurlu şəkildə qurban vermək deməkdir. Şəhidlik verilmiş ömür payını gələcək nəsillərin xoşbəxtliyinə bağışlamaqdır. Onların bu fədakarlığı heç zaman unudulmayacaq.

Azərbaycan Respublikası Silahlı Qüvvələrinin Ali Baş Komandanı, Prezident İlham Əliyevin müvafiq sərancamı ilə şəhid Zahid Zairli “Vətən müharibəsi iştirakçısı'”, “Cəsur döyüşçü”, "Füzulinin azad olunmasına görə" və "Kəlbəcərin azad olunmasına görə" medalları  və "Rəşadət ordeni"ilə təltif olunub.

Allah bütün şəhidlərimizə rəhmət eləsin. ( Hazırda hazırladığımız “Qəhrəmanlıq tariximiz: nəsillərə  örnəkdir” adlı kitabdan bir parça)

Fact-info.az