Azərbaycan və Qazaxıstan ortaq tarixi-mədəni irs, dil yaxınlığı və qədim türk kökləri ilə birləşdirilən türkdilli dövlətlərdir. Fact-info.az xəbər verir ki, bu barədə AZƏRTAC -a açıqlamasında tarix elmləri namizədi, Dövlət Tarixi İnstitutunun şöbə müdiri Erlan Medeubayev deyib.

“Bizim ümumi mənəvi mədəniyyət abidələrimiz var - məsələn, oğuz mədəni ənənəsi ilə bağlı olan Korkıt Ata (Dədə Qorqud) dastanı: “Onun mənşəyi Sırdərya bölgəsinə gedib çıxır”, - deyə o qeyd edib.

Alimin sözlərinə görə, azərbaycanlıların etnogenezi əsasən oğuz tayfaları ilə bağlıdır, qazaxlar isə qıpçaq köklərinə aiddir. Lakin ümumi mədəni təbəqə, o cümlədən dil, dastanlar, adət-ənənələr və dünyagörüşü bir çox cəhətdən oxşardır.

E.Medeubayev vurğulayıb ki, Azərbaycan və Qazaxıstan arasında humanitar siyasət, tarixi-linqvistik tədqiqatlar və birgə akademik layihələr sahəsində əməkdaşlıq daha fəal inkişaf etdirilməlidir.

“1918-ci ildə elan edilən Azərbaycan Xalq Cümhuriyyəti müsəlman dünyasında ilk parlament respublikası oldu”, - deyə o bildirib.

Onun fikrincə, Qafqaz və Mərkəzi Asiya türk xalqlarının tarixinə dair inteqrasiya olunmuş dərsliyin hazırlanması, eləcə də mütəmadi olaraq birgə konfransların və gənclər forumlarının keçirilməsi perspektivli istiqamətlərdən biri ola bilər.

Qazax cəmiyyətinin türk irsi haqqında məlumatlılıq səviyyəsi ilə bağlı sualı cavablandıran E.Medeubayev məlumat verib ki, qazax məktəb proqramında qədim türk dövrünün, o cümlədən türk dünyasının müxtəlif etnik qruplarının bəşər sivilizasiyası tarixinə verdiyi töhfənin öyrənilməsi nəzərdə tutulub.

O, müasir gənclərin türk mədəniyyətinə marağının nəzərəçarpacaq dərəcədə artdığını da qeyd edib: Bu yaxınlarda başqırd qrupunun mahnısı gözlənilmədən bütün türk məkanında populyarlıq qazandı. Onu tatar dilindən tutmuş özbək dilinə qədər müxtəlif dillərdə ifa ediblər. Bu, mədəni kimliyin gənclər üçün aktual dəyərə çevrildiyinə işarədir”.

Tarixçi Qazaxıstandakı Azərbaycan diasporunun roluna xüsusi diqqət yetirib.

“Qazaxıstanda ölkənin layiqli vətəndaşları olan Azərbaycan əsilli tanınmış sahibkarlar, alimlər, idmançılar, ictimai xadimlər yaşayır.

Beləliklə, ölkələrimizi təkcə ümumi keçmiş deyil, həm də sabit qarşılıqlı rəğbət, ən əsası isə humanitar sahədə strateji tərəfdaşlıq üçün potensial birləşdirir”, - deyə E.Medeubayev sözünü yekunlaşdırıb.