Türkiyədəki səfirliyimizin nəzdində fəaliyyət göstərən Azərbaycan Mədəniyyət Mərkəzi ilə Ankara Universiteti arasında Azərbaycan dilinin tədrisi və təbliği istiqamətində əməkdaşlıq genişlənir.

Fact-info.az xəbər verir ki, Ankara Universitetinin Dil, tarix və coğrafiya fakültəsinin Çağdaş türk ləhcələri və ədəbiyyatı bölməsi nəzdində fəaliyyət göstərən Azərbaycan dili ixtisası üzrə ana dilimiz və ədəbiyyatımızla bağlı layihələrin həyata keçirilməsi, bununla bağlı tədbirlərin, müsabiqələrin, tanınmış şəxsiyyətlərin yubileylərinin keçirilməsi, habelə fakültənin Azərbaycana dair nəşrlərlə təmin olunması müzakirə edilib.

Azərbaycan Mədəniyyət Mərkəzinin direktoru Samir Abbasov Çağdaş türk ləhcələri və ədəbiyyatı bölümünün rəhbəri professor F.Sema Barutcu Özöndər və bölüm nəzdində fəaliyyət göstərən Azərbaycan dili ixtisasının müdiri Dr. Mehmet Rıza Heyet ilə görüş keçirib.

Görüş zamanı ortaq layihələr, ana dilimizin tədrisi prosesi, Azərbaycan türkcəsinə maraq və perspektivlər, sözügedən fakültə ilə Azərbaycan Mədəniyyət Mərkəzi tərəfindən Qazi Universitetində yaradılmış Azərbaycan dilinin Tədrisi Ocağı arasında əməkdaşlıq və gələcək layihələrə dair fikir mübadiləsi aparılıb.

Sonda Azərbaycan dili ixtisasının tələbələri ilə görüş keçirilib.

Görüş zamanı Azərbaycan dilinin öyrənilməsi, milli mədəniyyətimiz və tariximizlə bağlı çıxışlar və məruzələr dinlənilib, tələbələrin maraq doğurduğu suallar cavablandırılıb. Azərbaycan Mədəniyyət Mərkəzi tərəfindən ölkəmizlə bağlı kitab kolleksiyası hədiyyə olunub.

Qeyd edək ki, Azərbaycan Respublikası Mədəniyyət Nazirliyinin dəstəyi ilə xarici ölkələrdəki Azərbaycan mədəniyyət mərkəzləri milli mədəniyyətimizlə yanaşı, ana dilimizin təbliği ilə bağlı layihələr reallaşdırırlar.