Aktual problem olan miqren və baş ağrıları dünyada ən çox yayılmış xəstəliklər siyahısındadır. Miqren digər baş ağrılarından çox fərqlənir. İlkin fərq ağrının birtərəfli olmasıdır. Yəni əksər hallarda ya sağ, ya da sol tərəfdə ağrı müşahidə edilir.

Fact-info.az xəbər verir ki, bunu AZƏRTAC-a müsahibəsində "Azərbaycan Miqren Mütəxəssisləri" İctimai Birliyinin təsisçilərindən biri, Azərbaycanın ilk miqren və baş ağrıları mütəxəssisi Sərxan Əmirquliyev deyib.

Mütəxəssisin sözlərinə görə miqren 75 faiz hallarda ürək döyüntüsü kimi döyünmə verir: "Xəstələr alın ya gicgah nahiyəsində döyüntülərdən şikayətlənirlər. Ağrı artan templə başlayaraq dözülməz hala gəlir. O həddə çatanda insanlar artıq heç bir iş görə bilmir, əmək fəaliyyətlərini itirirlər. Ağrı o qədər güclü olur ki, insan konsentrasiyasını itirir, özünü idarə edə bilmir. Sakit mühit axtarır, işığa, səsə həssaslığı yaranır. Eyni zamanda, ürəkbulanma, qusma da qeydə alınır. Bəzən ağrı o qədər güclü olur ki, xəstə ağrıkəsicilərlə onun qarşısını ala bilmir və yataqda qalmaq istəyir. Səs-küylü məkandan, insanlardan qaçır, tənhalığa meyil edir. Həmin ağrılar 4 saatdan 72 saata qədər davam edə bilir. Uzun müddət davam edən güclü ağrılara görə miqren dünyada əzabverici və əlilliyə gətirib çıxaran baş ağrıları növlərinə aiddir. Miqrendən başqa digər baş ağrıları belə bir əlilliyə gətirib çıxarmadığı üçün bu gün dünyada miqren cəmiyyətləri fəaliyyət göstərir. Hətta xəstələr üçün miqren klubları da mövcuddur. Orada miqren xəstələrinə tövsiyələr verilir. İrəlidə cəmiyyət olaraq çalışacağıq bu məsələyə də təkan verək və pasiyentlər üçün klub yaradaq. Həmin klubda miqren xəstələri ilə görüşüb onlara tövsiyələrimizi verək, maarifləndirici tədbirlər keçirək".