“İçərişəhər” Dövlət Tarix-Memarlıq Qoruğu İdarəsinin və Bakı Rəsm Qalereyasının birgə təşkilatçılığı ilə Şirvanşahlar Sarayı Kompleksində “Hərflərin sirri” adlı xəttatlıq sərgisi ziyarətçilərə təqdim olunub. Sərgi qədim və zəngin estetikaya malik bir ənənənin sirlərini kəşf etmək imkanı yaradır.

Fact-info.az xəbər verir ki, sərgidə tanınmış xəttat Gülümxan Bəydəmirin 60-dan çox əsəri yer alır.

Sərginin açılış mərasimində “İçərişəhər” Dövlət Tarix-Memarlıq Qoruğu İdarəsinin Aparat rəhbərinin müavini Rəna Nəsirova, Bakı Rəsm Qalereyasının Eldəniz Babayev, Milli Məclisin deputatı Fazil Mustafa, Xalq rəssamı Arif Hüseynov və Xalq artisti Alim Qasımov çıxış edərək bildiriliblər ki, bu əsərlər vasitəsilə tamaşaçılar xəttatlığın yalnız yazı texnikası deyil, həm də fəlsəfi və ruhani bir ifadə vasitəsi olduğunu daha dərindən hiss edə bilirlər. Əsrlər boyu Şərqdə həm elmə, həm də mənəviyyata xidmət edən bu sənət forması sözün estetik təqdimatı ilə seçilir. Mətnin forması, simvolikası və ruhu bu sənətin əsas dayaqlarındandır. G. Bəydəmirin yaradıcılığı Azərbaycanın xəttatlıq irsini müasir dilə gətirir və bu sənətin beynəlxalq arenada tanıdılmasına öz töhfəsini verir. Onun əsərləri müxtəlif ölkələrdə nümayiş olunub və sənətşünaslar tərəfindən yüksək dəyərləndirilib.

Diqqətə çatdırılıb ki, əslən Şamaxıdan olan G.Bəydəmir 1970-ci ildə Əzim Əzimzadə adına Dövlət Rəssamlıq Məktəbinə qəbul olub. 1971-1973-cü illərdə hərbi xidmətdə olarkən Rusiyanın Xabarovsk şəhərində sulu boya ilə ilk fərdi sərgisini açıb. 1972-ci ildə Xabarovsk vilayət rəssamlarının rəsm sərgi-müsabiqəsində iştirak edərək akvaril mənzərəsinə görə ikinci yerə layiq görülüb. O, rəssamlıq məktəbini bitirdikdən sonra daş üzərində oyma, xəttatlıq sənətlərinə maraq göstərib.

1995-ci ildə Türkiyəyə gedən rəssam ustad xəttatlardan dərs alıb, dünyaşöhrətli xəttat Davut Bektaşdan bu sənətin incəliklərini öyrənib. 2006-cı ildə İstanbulda keçirilən müsabiqədə “Ahmed-Muhammed” adlı əsəri ilə birinci yeri tutub. Hazırda G.Bəydəmirin əl işləri Azərbaycan, Türkiyə, Almaniya, Hollandiya, Avstriya, Koreya Respublikası və Fransada şəxsi kolleksiyalarda saxlanılır.

Tədbirin təşkilatçılarına və iştirakçılarına minnətdarlığını bildirən Gülümxan Bəydəmir sərgidə nümayiş olunan əsərlər barədə iştirakçılara məlumat verib.

Sonra iştirakçılar sərgi ilə tanış olublar.

İçərişəhərin tarixi atmosferində təqdim olunan “Hərflərin sirri” sərgisi yalnız incə sənət nümunələri ilə deyil, həm də dərin mənəvi dəyərləri ilə diqqət çəkir. Aprelin 22-dək davam edəcək sərgi ziyarətçilərə həm sənət, həm də zamanla səyahət təcrübəsi yaşayacaq.