Azərbaycan Respublikasının Mədəniyyət Nazirliyi, Bakı Beynəlxalq Multikulturalizm Mərkəzi və Qarabağ Dirçəliş Fondu arasında əməkdaşlıq çərçivəsində Qarabağın işğaldan əvvəlki və sonrakı vəziyyətini sənədləşdirən “Yaralı miras: Səssiz şahidlər” fotoalbomu işıq üzü görüb.

 Fact-info.az xəbər verir ki, 12 bölmədən ibarət fotoalbom Azərbaycanın Qarabağ və Şərqi Zəngəzur bölgələrindəki mədəni irsinin erməni işğalı dövründə məruz qaldığı vandalizm və dağıntıları sənədləşdirilmiş çoxsaylı faktlarla işıqlandırır.

Fotoalbom Ağdam, Füzuli, Qubadlı, Cəbrayıl, Kəlbəcər, Xocalı, Xocavənd, Laçın, Şuşa, Tərtər, Zəngilan rayonlarının mədəni irsinin işğaldan əvvəl çəkilən nadir orijinal fotoşəkilləri və azad edildikdən sonra eyni ərazilərdə çəkilmiş görüntüləri qarşılaşdıraraq, məşhur fotojurnalist Reza Deqatinin obyektivi vasitəsilə oxucuları mənalı və düşündürücü kontrasta şahidlik etməyə dəvət edir. Fotoşəkillər qısa məlumatlandırıcı təsvirlərlə müşayiət olunsa da, özü-özlüyündə acı həqiqəti ifadə edir.

Reza Deqati fotoalbomda müharibənin və işğalın mədəni irsə vurduğu zərbələri fotoşəkillərlə əks etdirərək, Qarabağdakı tarixi və mədəni abidələrin dağıdılması, vandalizmə məruz qalması barədə faktları dünyaya çatdırıb.

Dağıdılan məscidlər, qəbirlər, heykəllər və digər tarixi abidələr Rza Deqatinin obyektivindən oxucuya Qarabağın yaşadığı faciəni açıq şəkildə göstərir.

Bu fotoalbom təkcə fotosənəd deyil, həm də tarixin şahididir. O, müharibənin təkcə insanlara deyil, həm də mədəniyyətə vurduğu yaraları nümayiş etdirərək, gələcək nəsillərə ötürüləcək mühüm vizual mənbə rolunu oynayır.

Kitab Qarabağ həqiqətlərinin dünyaya çatdırılması və beynəlxalq ictimaiyyətin diqqətinin bu məsələyə yönəldilməsi baxımından böyük əhəmiyyətə malikdir.