"Ermənistanın "Past" qəzeti revanşist qüvvələrə yaxın bir qəzet hesab olunur. Bu yazının da mahiyyəti erməni millətçiliyinə dayanır". 

Bu fikirləri politoloq  Oqtay Qasımov bildirib:

"Onlar hesab edirlər ki, Türkiyə ilə Ermənistan münasibətləri normallaşsa, Ermənistanın vəziyyəti çox ağır olacaq. Faktiki olaraq  Ermənistan Türkiyənin 83-cü vilayətinə çevriləcək. Belə absurd iddialarla çıxış edirlər. Təbii ki, Türkiyənin Güney Qafqazda rolu son illərdə ciddi şəkildə artıb. Bu prosesə təkan verən əsas amil Azərbaycanla Türkiyənin strateji müttəfiqliyi və Şuşa bəyannaməsi ilə yekunlaşan münasibətlərdir. Azərbaycanla Türkiyə koordinasiyalı siyasət həyata keçirirlər. Məhz Azərbaycanın öz ərazilərini işğaldan azad edərək suverenliyi tam bərpa etməsi Güney Qafqazda bütün mənzərəni dəyişib. Türkiyə bölgədə sülh və sabitliyin olmasını istəyən əsas ölkələrdən biridir. Məhz bu səbəbdən Azərbaycanla Türkiyə hələ dörd il öncə "3+3" əməkdaşlıq formatını təklif etdilər. Türkiyənin Gürcüstanla münasibətləri də kifayət qədər inkişaf edib, münasibətlər normal səviyyədədir və müxtəlif sahələrdə əməkdaşlıq inkişaf edir. Ermənistan istəsə də, istəməsə də Güney Qafqazda sülh və sabitlik bərpa olunacaq. Ermənistanın Türkiyə və Azərbaycanla münasibətlərinin qurulmaması ilk növbədə özünə ciddi şəkildə ziyan vuracaq və Ermənistan bu günə qədər olduğu kimi dalan ölkə kimi qalacaq. Onun iqtisadiyyatının güclü inkişafı, ümumiyyətlə, Ermənistanın mövcudluğu Azərbaycan və Türkiyəylə münasibətlərin normallaşmasından keçir. Bu baxımdan erməni mediasında bu və ya digər xarakterli yazılar çıxacaq. Bu yazının özü də məhz hal-hazırda davam edən, Keşişin başçılıq etdiyi, cəmiyyətin də diqqətini çox cəlb etməyən etiraz aksiyalarına daha çox elektoratı cəlb etmək kimi də düşünülə bilər. Çünki məhz həmin etiraz aksiyalarında səslənən fikirlərlə bu media qurumunda gedən yazının tezisləri bir-birindən heç də ciddi şəkildə fərqlənmir".