Ötən ilin dekabrın 12-də başlayan QHT-lərin və ictimai fəalların ekoloji terrora davamlı etirazları yeni bir mərhələnin başlanğıcı oldu. İndi o barədə danışmaq rahatdır. Lakin o zaman çox fədakar QHT nümayəndələrinin  bu prosesdə fədakar mübarizəsi bir çox mətləbləri ortalığa çıxartdı. Həmin dövrdə Rusiya sülhməramlılarının müvəqqəti nəzarətində olan ərazilərdə faydalı qazıntı yataqları, xüsusilə, Qızılbulaq qızıl və Dəmirli mis-molibden yataqlarının qanunsuz istismarına etiraz aksiyası QHT sektorunun potensialını göstərdi.  Bu, bir daha sübut etdi ki, Azərbaycanın Vətəndaş Cəmiyyəti İnstitutları bir çox zəruri işləri görmək gücündə olan əhəmiyyətli sahədir. Bu sektoru millətin, dövlətin, cəmiyyətin inkişafına cəlb etmək  effektiv nəticələr verər. 

 Bir vacaib məqamı qeyd etmək  istərdim. Orada olduğumuz dövrdə  Şuşanın xoş aurası, Azərbaycan insanın fədakarlığı, torpağa nə qədər bağlığı aksiya iştirakçısı olaraq bizə bütün çətinliyi unutdurdu. İqlim şəraitinin, havanın necə olmasından asılı olmayaraq biz etiraz aksiyalarında iştirak etməkdən qürur hissi keçirdik.  Bir məqamı düzgün dərk etmək lazımdır. Dünyada yumşaq güc faktorundan istifadə etmək nəticəsiz qalmır. Ona görə, Azərbaycanda Vətəndaş Cəmiyyəti İnstitutlarının potensialını düzgün dəyərləndirmək  və bu resursları yalnız dövlətin, millətin, cəmiyyətin inkişafına yönəltmək lazımdır.    

 Bütün məkrli planlara baxmayaraq, Azərbaycan insanı hər zaman dəyərlərinə sadiqdir, torpağına bağlıdır.  Bir məqamı unutmaq olmaz ki,  istər ekologiyaya, istər yurd yerlərinə, istərsə insanlığa qarşı törədilən cinayət əməlinə görə, hər kəs gec-tez cavab verir. Qarabağda törətdiyi cinayətlərinə görə, bu gün Azərbaycan həbsxanalarında bir  sıra separatçıların istintaqı davam edir.  Mən əminəm ki,  miliyyətindən, dinindən asılı olmayaraq  hər kəs törətdiyi əmələ görə cavab verəcək.  

  Əkrəm Bəydəmirli