Professor Kamran İmanovun rəhbərliyi ilə Əqli Mülkiyyət Agentliyinin nəşr etdiyi "Erməniçilik uydurmaları digər xalqların hüquqlarına xələl gətirir" əsəri əsasında hazırlanmış və bu yaxınlarda Azərbaycan Televiziyasında "Tarixin izi ilə" silsiləsindən efirə getmiş "Keçmişin böyük yalanları - Armeniya və Hayastan" verilişində saxta erməni tarixi, "Armeniya" və "Ermənistan" anlayışlarının yaranması, onun inkişaf mərhələləri mənbələr və elmi əsaslarla ətraflı şərh olundu. Zəngin mənbələrə, dərin elmi dəlillərə istinadən "Armeniya" və "Ermənistan" anlayışlarının etnik anlam deyil, coğrafi məkan ifadə etdiyi, "Armeniya" və "Ermənistan" anlayışlarının bu coğrafiyaya gəlmə olan haylarla heç bir əlaqəsinin olmadığı əsaslandırıldı. Tarixi "Armeniya" coğrafi məkanın müasir Ermənistan Respublikasının ərazisində deyil, Şərqi Anadoluda yerləşdiyi və müxtəlif etnosların, o cümlədən, xatti, xettlər, xurrilər, alarodi-urartular, sonradan qəmərlilər və saklar, eləcə də digər turan mənşəli xalqların yaşayış məskəni olduğu mənbələr əsasında tutarlı faktlarla göstərildi. Hayların bölgənin avtoxton, yəni yerli sakinləri olmadığı, bölgəyə gəlmə olmaqla heç zaman burada çoxluğu təşkil etmədiyi və kiçik koloniya şəklində məskunlaşdığı elmi həqiqətlər işığında ifadə edildi.

ABŞ-ın Kolumbiya universitetinin professoru, tanınmış ermənişünas Nino Qarsoyana görə, Moisey Xorenlinin "Erməni xalqının tarixi" adlı əsəri, onların xristianlığı qəbul etməsi tarixi başdan-ayağa uydurmadır. Çünki V əsrdə hər hansı bir xalqın formalaşması barədə irəli sürülən fikiflər bütünlüklə cəfəngiyyatdan ibarətdir.

Tarixi həqiqətlərin geniş tamaşaçı kütləsinə, xüsusilə yeniyetmələrə və gənclərə çatdırılmasının təqdirəlayiq olduğunu nəzərə alaraq, bu istiqamətdə addımların davam etdirilməsi məqsədəuyğun sayırıq. Bununla yanaşı, kitabda əksini tapmış məlumatlardan, eləcə də adı çəkilən televiziya verilişindəki materiallardan həm orta məktəblərin tarix dərslərində, həm də ali məktəblərdə tarix fənni üzrə təhsil alan tələbələr üçün məşğələlərdə istifadə edilməsi böyük fayda verə bilər. Hesab edirik ki, Azərbaycan Televiziyasının hazırladığı bu verilişin xarici dillərə (ingilis, fransız, alman, rus, ərəb və s.) tərcümə edilməsi də vacibdir və bu verilişin xarici dillərdə yayımlanması, eləcə də xaricdə fəaliyyət göstərən səfirliklərimizə, beynəlxalq təşkilatlara, həmçinin, ölkəmizdə fəaliyyət göstərən xarici şirkətlərin mərkəzi ofislərinə, Azərbaycanın ali məktəblərilə əməkdaşlıq edən xarici universitetlərə, elmi tədqiqat mərkəzlərinə göndərilməsi məqsədəuyğun olardı.

Böyük alimlər, elm adamları haqqında nəsə yazılanda adətən, onların bir neçə əsas işi önə çəkilir. Bu anlamda Əqli Mülkiyyət Agentliyi İdarə Heyətinin sədri, əqli mülkiyyət üzrə beynəlxalq ekspert, professor Kamran İmanovun  "Erməniçilik uydurmaları digər xalqların hüquqlarına xələl gətirir" əsərinin geniş təbliği böyük əhəmiyyət kəsb edə bilər.

Hafiz CABBAROV

Bakı şəhəri Heydər Əliyev adına liseyin tarix müəllimi