Bu qərəzli qətnamə layihəsinin ilkin mətnində Azərbaycanın guya Ermənistana hərbi təcavüz etməsi, Laçın yolunun guya “blokada”da olması kimi iddialar, eləcə də gorbagor olmuş “Minsk qrupu”, “status”, “Dağlıq Qarabağda və ətrafında” kimi keçmiş, sərsəm və gündəlikdə ümumiyyətlə olmayan məsələlər əksini tapıb. Əlbəttə, bizim üçün təəccüblü heç nə yoxdur. Çünki bu qurumun ölkəmizə qarşı qərəzli mövqe tutması ilk dəfə deyil. Bundan öncə də dəfələrlə birtərəfli, araşdırılmamış qeyri-obyektiv qərarların şahidi olmuşuq.

Fact-info.az-ın məlumatına görə, bu fikirləri siyasi ekspert Züriyə Qarayeva AZƏRTAC-a açıqlamasında deyib.

Avropa Parlamentinin erməni təəssübkeşliyini artıq gizlədə bilmədiyini vurğulayan dövlətimizin başçısı bildirib: “Bu kimi təşkilatların məqsədi ölkəmizi haqlı mövqeyindən çəkindirərək, Azərbaycan qarşısında zəifləmiş Ermənistanın mövqelərini nisbətən ölkəmizlə eyniləşdirməkdir. Bu qurum əgər insan haqlarından dəm vurursa, nəyə görə ölkəmizin tapdalanan haqlarını bir dəfə də olsun dilə gətirməyib? Otuz illik işğal dövründə hansı qərarları qəbul edib və tətbiqinə nail olub? İşğal zamanı məhv edilən tarixi-mədəni irsimizə qarşı hansı həssaslıq nümayiş olunub? Bir milyondan artıq insanın qaçqın və məcburi köçkün vəziyyətinə düşməsi Avropa Parlamenti üçün hüquq pozuntusu deyilmi? Avropa Parlamentinin dəstəklədiyi Ermənistan işğal dövründə minalanmış ərazilərin xəritələrini hələ də təqdim etməyib. Keçmiş məcburi köçkünlər məhz bu mina səbəbindən hələ də doğma yurdlarına qayıda bilmirlər. Taleyi bilinməyən əsirlərimizin hüquqları Avropa Parlamenti üçün niyə önəm daşımır? Biz artıq susmamalıyıq. Obyektiv mövqe sərgiləməyən heç bir qurum nəzərə alınmamalı, qərarların icrasını ciddiyə almalıdır. Bu qurum açıq şəkildə göstərdi ki, erməni lobbisinin təsiri altındadır”.

Politoloq açıqlamasında Azərbaycanın dövlət qurumlarının nümayəndələrinin və mütəxəssislərin işğaldan azad edilən ərazilərimizdə təbii sərvətlərimizin qanunsuz istismarının monitorinqinin aparılması məqsədilə əraziyə girişinə maneçilik törədilməsi ilə əlaqədar vətəndaş cəmiyyəti nümayəndələrinin və ekoloqların Laçın-Xankəndi yolunda keçirdikləri dinc etiraz aksiyasına da münasibət bildirib. Qeyd edib ki, Avropa Parlamentinin məlum qətnaməsində iddia edilənlərin əksinə olaraq, Laçın dəhlizi Rusiya sülhməramlılarının daşıdığı humanitar yüklər, Beynəlxalq Qırmızı Xaç Komitəsinin nümayəndələrinin, eləcə də Qarabağda yaşayan ermənilərin, həmçinin uşaqların və xəstələrin gediş-gəlişi üçün açıqdır. Qətnamədə göstərilən, guya Azərbaycanın Qarabağ ərazisinə təbii qazın verilməsinə əngəl olmasıyla bağlı iddialar isə ağ yalandır. Bunu gözləri ilə görməsi üçün Azərbaycan tərəfindən hər cür şərait yaradılıb. Qeyri-real məsələlərlə bağlı qətnamə qəbul edən Avropa Parlamenti üçün daha real səbəblər təqdim edə bilərik.

“44 günlük Vətən müharibəsindən sonra Azərbaycanın üzləşdiyi mina terroru nəticəsində 300-ə qədər Azərbaycan vətəndaşının partlayışların qurbanına çevrilməsi qətnamə predmeti ola bilməz? 2020-ci il 10 noyabr tarixli üçtərəfli Bəyanata zidd olaraq Ermənistan qoşunlarının Azərbaycan ərazilərindən tam şəkildə çıxarılmamasına niyə göz yumulur? Bizim üçün artıq Avropa Parlamenti da daxil olmaqla beynəlxalq təşkilatların qeyri-obyektiv mövqeyi heç bir əhəmiyyət daşımır. Bunu biz torpaqlarımızı işğaldan azad edərkən təsdiqlədik. Lakin Avropa Parlamenti unutmasın ki, Azərbaycan Avropa İttifaqı üçün olduqca önəmli ölkədir. Enerji layihələrindən tutmuş kommunikasiya əlaqələrinə, qitə ölkələrinin Rusiya asılılığından azad olunmasına, ölkələrin yaşıl enerji tələbatının ödənilməsinə qədər Avropa ölkələrinin Azərbaycana ehtiyacı var. Örkən nə qədər uzun olsa, yenə doğanaqdan keçəcək. Avropa ikili standartları tətbiq edərkən ən azından öz maraqlarını hərtərəfli düşünməlidir”, - deyə siyasi ekspert vurğulayıb.