Fact-info.az-ın  məlumatına görə, Litvalı tanınmış ekspert, hərbi jurnalist, Birinci Qarabağ müharibəsinin şahidi Riçardas Lapaytis bu fikirləri AZƏRTAC-a müsahibəsində söyləyib.

Müsahibimiz xatırlayır: “Təəssüf ki, bu məsələdə ədalətlilik hələ də təmin olunmayıb. Mənim fikrimcə, bir gecədə həm evlərini, həm də yaxınlarını, doğmalarını itirmiş dinc Xocalı sakinlərinin dəhşətli taleyi barədə informasiyanın yayılması çox vacibdir. Bir mənzərəni heç vaxt unutmaram: ayağı amputasiya edilmiş gənc ana, onun yanında da uşaqları əyləşib, uşaqlardan birinin əli amputasiya edilib. Ana ümidsiz halda göz yaşı tökür, çünki bundan başqa əlindən heç nə gəlmir. Yaxınlıqda heç bir beynəlxalq təşkilat, heç bir humanitar kömək yoxdur, istər Qərbdən, istər başqa bir yerdən heç bir həkim gəlməyib. Yəni bu insanlar hər şeyi öz qüvvələri ilə həll etməli olurdu”.

Onun sözlərinə görə, başlanmış cinayət işləri çərçivəsində bu faciənin təqsirkarlarının, o cümlədən 366-cı motoatıcı alayın əsgər və zabitlərinin soyadları müəyyən olunduğunu nəzərə alsaq, Xocalıya ədalətin təmin edilməsinin yeganə yolu beynəlxalq məhkəmələrə, o cümlədən Haaqa tribunalına müraciət etməkdir.

Litvalı jurnalist əmindir: “Bu məsələdə ləngimək olmaz. Bu yaxınlarda məşhur ukraynalı pilot, çox dürüst adam olan Leonid Kravets vəfat edib. Jurnalist Çingiz Mustafayevlə eyni helikopterdə göydən aşağı baxanda Xocalı sakinlərinin, o cümlədən uşaqların, qadınların, qocaların cəsədləri ilə dolu böyük bir sahə görmüş Kravets müsahibələrinin birində vəd etmişdi ki, məhkəmə baş tutarsa canlı şahid kimi Haaqa tribunalına getməyə hazırdır. Lakin artıq o, aramızda yoxdur. Mən də eyni sözləri deyirəm, lakin vaxt gözləmir. Əgər canlı şahidlər qalmasa nə barədə danışacağıq, kim şahidlik edəcək? Adi materiallar kafi sayılmayacaq. Faciədən sonra sağ qalmış Xocalı sakinləri də get-gedə azalır. Vaxtı itirmədən beynəlxalq məhkəmələrə, o cümlədən Haaqa tribunalına müraciət etmək lazımdır. Onda məsələ həll ediləcək”.