O, əməkdaşımızla söhbəti zamanı fikirlərini belə açıqlayıb: “Son iki yüz ildə Azərbaycan ilk dəfə möhtəşəm tarixi  qələbə qazandı. Torpaqlarımızı işğal edən, dinc insanlara qarşı hər zaman terror  aktı törədən düşmənin alınmaz sədləri, səngərləri qəhrəman oğullarımız tərəfindən darmadağın edildi. Azərbaycan əsgəri möhtəşəm qələbə qazandı. Bu gun şüküranlıqla, böyük ruh yüksəkliyi ilə Tarixi Zəfərimizi qeyd edirik. Bizə qələbə nəsib edən Şəhidlərimizə rəhmət diləyirik, qazilərimizə can sağlığı arzulayırıq”. 

Anar doktor daha sonra 44 günlük müharibə dövrünə nəzər salaraq qeyd edib:  “Mən müharibə başlayan kimi könüllü olaraq cəbhəyə getmişəm. Naftalan xəstəxanasında çalışdım. İlk günlər təchizatla bağlı problemlər olurdu. Amma sonradan bu məsələləri həll etdik. Peşəkar tibbi heyətlə birlikdə Naftalandakı xəstəxanada maksimum qüvvə ilə çalışdıq. Prezidentimizin dəstəyi bizi ruhlandırmışdı. Bizim də borcumuz əsgərlərimizin yanında olmaq idi. Həyata keçirdiyim cərrahi əməliyyatların sayı təxminən 50-dən artıq olub. Çünki hər gün, hətta gecələrdə əməliyyat blokunda çalışırdım. Vaxt tapan kimi bir az dincəlirdik ki, gecə gələn xəstələrimizi əməliyyat edə bilək. 4 əməliyyat bloku təşkil etmişdik. Elə olurdu gün ərzində xəstəxana dəfələrlə dolub boşalırdı. Biz gələn yaralıları əməliyyat edib arxa cəbhədə olan digər xəstəxanalara göndərirdik. Əməliyyat etdiyimiz xəstələrin demək olar ki, hər biri sonradan sağlamlıqlarına qovuşdu. Məhz fədakar həkimlərimizin səyi nəticəsində biz həm xəsarət almış, ağır yaralanmış hərbçilərimizi müalaciə etdik, həm də çox ciddi çalışmağımız nəticəsində ölüm saylarının maksimum azalmasına nail olduq. Naftalan xəstəxanasına gətirilmiş yalnız bir əsgərimizi həyata qaytara bilmədik. O, çox ağır durumda gətirilmişdi. Qalan bütün yaralılarımızı  əməliyyat edib sağlamlıqlarına qovuşmasına nail olurduq.Həkimlərimiz ali missiyanı axıra qədər davam edirirlər. Mənim qənaətimcə, həkimlərimiz, ümumilikdə, təbabət sahəmiz ən çətin əməliyyatlar yerinə yetirərək kifayət qədər təcrübə qazandı”. 

Anar doktor hərbi həkimlərin yetişməsi, onların bilik və bacarıqlarının artırılması məsələləri ilə toxunaraq bildirib ki,  Azərbaycan düşmənlə əhatə olunmuş ölkədir. Bu baxımdan Ordumuzun peşəkarlığı  ilə bərabər hərbi  həkimlərimizin peşəkar səviyyədə yetişməsi çox vacibdir.  Amma bir ümumi  cərrahın yetişməsi uzun illərin və böyük zəhnmətin hesabına başa gəlir. Bu baxımdan biz peşəkar kadr hazırlığı məsələlərinə çox həssaslıqla yanaşmalıyıq. Mən də bir cərrah olaraq hər zaman  əsgərlərimizin yanındayam. Hərbçilərimizin sağlamlığı üçün nə mümkündürsə etməyə hazıram. Tarixi Zəfərimiz mənim üçün ikiqat bayramdır. Ona görə ki, mənim öz doğma yurdum Kəlbəcər rayonu azadlığına qovuşub. Kəlbəcər işğal olunan zaman mənim 13 yaşım var idi. Bu gün şüküranlığımı bildirirəm ki, öz yurdumu azad görmək mənə nəsib oldu. Zəfərimiz mübarək olsun Azərbaycan!

Fact-info.az