Aprelin 5-də Azərbaycan və Ermənistan Silahlı Qüvvələri baş qərargahlarının rəisləri Moskvada görüşünün nəticəsi olaraq, Azərbaycanın işğal altında olan Dağlıq qarabağ bölgəsində təmas xəttində atışma dayandırılıb. Bu döyüşdə işğal altında olan bəzi ərazilərimizin azad edildiyi haqda rəsmi məlumatlar yayılıb. Düzdür torpaqlarımız işğaldan tam edilməsə də, bununla belə bu uğuru Azərbaycan ordusunun şücaətinin göstəricisi, xalqımızın birliyinə örnək sayıla bilər. Azərbaycan Xarici İşlər Nazirliyinin məlumatına görə, ermənilər yenə təmas xəttinə yaxın ərazilərdə mülki əhalini və yaşayış obyetklərini atəşə tutub: "2016-cı ilin 2 aprel tarixində səhər erkən saatlardan başlayaraq Ermənistan münaqişə zonasında hərbi fəaliyyətini intensivləşdirərək, mülki əhaliyə qarşı müharibə cinayətləri və bəşəriyyət əleyhinə cinayətlərə bərabər tutulan çoxsaylı aktlar törədib.
Bu müddət ərzində Ermənistan tərəfi Ermənistan və Azərbaycan silahlı qüvvələrinin təmas xətti boyunca sıx məskunlaşmış ərazilərdə yaşayan, aralarında qadınlar, uşaqlar və ahılların da olduğu qeyri-döyüşçü mülki əhaliyə qarşı qəsdən, sistematik və hədəflənən hücumlar edib. 32 yaşayış məntəqəsinin bombalanması nəticəsində aralarında 16 yaşdan kiçik 2 uşaq olmaqla 6 mülki şəxs həlak olub, 26 şəxs ağır yaralanmışdır.
Hücumlar nəticəsində həmçinin çoxsaylı ictimai və şəxsi mülkiyyətə, o cümlədən mülki infrastrukturlara ciddi ziyan dəyib. 232 fərdi yaşayış evi, 99 elektrik dirəyi, 3 elektrik yarımstansiyası, kilometrlərlə su və qaz boruları dağıdılib. Məktəblər, xəstəxanalar və ibadət yerləri də daxil olmaqla sosial müəssisələrə Ermənistan silahlı qüvvələri tərəfindən idarə olunan raket zərbələri endirilib. 1 məscid ibadət zamanı yüksək kalibrli artilleriya mərmiləri ilə vurulub". Azərbaycan torpaqlarının işğaldan azad edilməsi məsələsində yuxlayan beynəlxalq vasitəçilər atəşin dayandırlımasında xeyli canfəşanlıq etdi. Bütün bunlara baxmayaraq, Azərbaycan dünyaya torpaqlarını azad etməyə qadir olduğunu göstərdi.

Mərhəmət Kimsəsizlərə Yardım İB-nin sədri İradə Polad