Bu fikirləri  Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının eksperti Toğrul Məmmədli deyib.

Ekspert bildirib ki, dünən Ankarada törədilmiş terror aktı bir daha bütün dünyanın bu təhlükədən sığortalanmadığını sübut etdi: “Azərbaycan tərəfi qardaş Türkiyədə baş vermiş  insanlığa qarşı bu cinayətə biganə qala bilməzdi. Elə məhz bu səbəbdən cənab Prezident İlham Əliyev Türkiyə Prezidenti Rəcəb Tayyib Ərdoğana başsağlığı məktubu ünvanlamış ilk siyasətçilərdən oldu”.

Onun sözlərinə görə tarixən ermənilər tərəfindən törədilmiş terror əməliyyatlarından əziyyət çəkmiş Azərbaycan terror dəhşətinin nə qədər ağır olduğunu çox yaxşı  bilir: “Buna görə də xalqımız terrorun bütün növünü pisləyir və bu dəhşətli hadisənin kədərini Türkiyə xalqı ilə birlikdə bölüşür. Bu gün bəzi dünya siyasətçiləri terrorun bu və ya digər formasını qeyri-rəsmi olaraq dəstəkləyir, bu kimi amansız cinayətlərə göz yumurlar. 1992-ci ilin fevralın 26-da faktiki hal-hazırda Ermənistanın Prezidenti olan şəxs - Serj Sarkisyan Xocalıya hücüm zamanı baş verən soyqırımı, insanlıq əleyhinə cinayət və hərbi terrora rəhbərlik edib”.(sia) 
Xatırladaq ki, dünən Türkiyənin paytaxtı Ankara şəhərinin mərkəzində törədilmiş terror aktı nəticəsində 34 nəfər həlak olub, 125-dən çox insan isə yaralanıb. Bu son bir ayda Ankarada törədilmiş 2-ci böyük terror aktıdır.