Kürdəmirin Tədqiqi və Təbliği İctimai Birliyinin təşkilatçılığı və f.ü.f.d Yaqut Bahadurqızının moderatorluğu ilə gənclərimizin vətənpərvərlik tərbiyəsinin inkişaf etdirilməsi məqsədi ilə "Vətən sizə əmanətdir, Azərbaycan gəncləri!" mövzusunda zoom platforması vasitəsilə onlayn toplantı keçirilmişdir.

Son günlərdə Ermənistanın təcavüzkarlığına qarşı döyüşlərdə qəhrəmancasına həlak olmuş şəhidlərimizi yad etdikdən sonra tədbiri açan f.ü.f.d Yaqut Bahadurqızı bütün iştirakçıları salamlamışdır. Yaqut Bahadurqızı ön sözdə vurğulamışdır ki, bugünkü müasir dünyada həyatımızın ayrılmaz tərkib hissəsi olan yeni texnologiyaların kəşfi, gənclərimizin ondan müxtəlif sahələrdə uğurla istifadəsi onu göstərir ki, savadlı, zehinli, dünyagörüşlü bir nəsil yetişməkdədir. Daha sonra isə söz gənclərə verilmişdir.

AR Prezidenti yanında Dövlət İdarəçilik Akademiyasının magistrantı Təbriz Qasımov gənclərdə vətənpərvərlik ruhunun yüksək səviyyədə olduğunu vurğulayaraq 12-13 iyul tarixlərində cəbhədə baş verən hadisələrdən təsirlənərək Bakıda dövlətimizə və ordumuza dəstək olmaq məqsədilə təşkil edilmiş yürüşü təqdirəlayiq hesab etsə də, həmin yürüşün Milli Məclisə daxil olmaqla nəticələnməsini qınamışdır. Həmçinin orta təhsil müəssisələrində, eləcə də ali təhsil müəssisələrinin bakalavr səviyyələrində hərbi quruculuqla bağlı təlim-tədris məsələlərini geniş həcmdə yer verilməli olduğunu bildirmişdir.

Bakı Dövlət Universitetinin tələbəsi Kəmalə Məmmədova nitqinə başlayarkən, Azərbaycan Respublikasında gənclərə diqqət və dövlət qayğısının yüksək səviyyədə olmasını xüsusi vurğuladı. Ulu Öndər Heydər Əliyevin və onun siyasi kursunu layiqincə davam etdirən cənab İlham Əliyevin gənclərə dəstəyindən bəhs etdi. Sonda isə bilikli gənc nəslin formalaşdırılması üçün güclü lider və güclü ölkənin olmasının ən böyük şərt olduğunu vurğuladı.

Bakı Dövlət Universitetinin III kurs tələbəsi Nuralı ismayılov Azərbaycanda dövlət siyasətinin bütün istiqamətlərinin, xüsusilə gənclər siyasətinin uğurla inkişaf etdirilməsindən söz açmışdır. Məktəbli Toğrul Məmmədəliyev Dəyirmi masaya qoşulub MİLLİ QƏHRƏMAN Mübariz İbrahimova həsr olunmuş şeiri coşquyla söyləyərək müzakirənin ovqatını daha da yüksəltdi.

Milli Məclisin deputatı Əminə Ağazadə öz çıxışında gənclərlə bağlı qəbul edilmiş hüquqi-normativ aktlarda, fərman və sərəncamlarda, dövlət proqramlarında gənclərin vətəndaşlıq və vətənpərvərlik tərbiyəsi ilə bağlı tədbirlər və təkliflərin öz əksini tapması ölkəmizdə gənc nəslin vətənpərvərlik ruhunun güclənməsi sahəsində həyata keçirilən işlərin uğurla davam etdirilməsindən söz açmışdır. Bu gün Azərbaycan gənci özünün ruh yüksəkliyi ilə, Vətənin, Ölkə Başçısının çağırışına anında öz səfərbəliyini nümayiş etdirməsiylə bir daha sübut edir ki, bu millətin gələcəyi etibarlı əllərdədir və heç bir qara qüvvə Azərbaycan gəncliyini öz müqəddəs missiyasından yanlış yönə çevirib özlərinin məkirli planlarında istifadə edə bilməyəcəyini xüsusi vurğulamışdır.

Gənclərin çıxışından sonra müzakirəni YAP Kürdəmir Rayon Təşkilatının sədri Ağali Kərimli, ehtiyatda olan polkovnik-leytenant Qabil Nəsibov, t.e.d., prof. Habil Məmmədov, şairə Zenfira Əlişqızı, tarixçi Zeynal Səfərov davam etdirmişlər.