Ermənistan Şimali Azərbaycanımızın 86,6 min kv.km.-lik torpağının 20 faizini işğal edib və bu işğalçılıq siyasəti bu gün də davam edir. Azərbaycan isə öz dədə-baba torpaqlarını düşməndən azad etməyə aktiv cəhd edə bilmir. Bununda bir neçə səbəbi var. Fikrimizcə, birinci səbəb kimi günahı özümüzdə axtarmalıyıq. Çünki torpağı düşməndən biz azad etməliyik. Bunun üçün yaxşı silahlanmışıq və döyüşkən ordumuz var. Lakin bununla yanaşı güclü təbliğat da aparılmalıdır. Təbliğat aparılır, düşünürəm ki, bu təbliğat yetırincə görünmür.

Etiraf olunmalıdır ki, Dövlətimiz beynəlxalq səviyyədə torpaqlarımızı erməni işğalçılarından azad etmək üçün çox çalışır. Mən bu çalışmaları sadalamaq istəmirəm. Çünki hər şey göz önündədir. Dövlətimizin bu sahədə xarici siyasətinin aktivliyini danmaq olmaz. Lakin bu aktivliyi biz daxili təbliğatda o qədər də görə bilmirik. Ola bilsin kimsə məni qınayar ki, dünya koronavirusla mübarizə apardığı bir vaxtda, sən də torpaqlarımızın azad edilməsindən, təbliğatdan danışırsan. Düşünürəm ki, bütün çətinliklərə baxmayaraq, torpaqlarımızın azad edilməsi üçün hər gün aktiv təbliğat apamalıdır. Neçə ki, koronavirusla bağlı bütün günü, dayanmadan təbliğat aparılır, eləcə də Qarabağımızı, torpaqlarımızı erməni işğalçılarından azad etmək üçün dayanmadan müharibə təbliğatı aparılmalıdır.

Fikrimizcə, təbliğat evlərimizdə, uşaq bağçalarımızda, orta və ali məktəblərimizdə, küçədə, reklamlarda, televiziyaların ekranlarında, radioda, dükanların içi və çölündə, bazarlarda, dəmiryolu vağzallarında, hava limanlarında, Respublikamızın xarici dövlətlərlə sərhəd-keçid məntəqələrində və s. yerlərdə aparılmalıdır İnsanlar koronavirus təbliğatından, sanki, az qala hər gün ölümünü gözləyir. Uşaqdan böyüyə kimi hamı bu virus haqqında düşünür və ya düşündürürlər. Qarabağımızı azad etmək üçün təbliğatımız bundan qat-qat artıq olmalıdır. Artıq olmalıdır ki, torpağımızı tezliklə azad etmək üçün xalqımızda ruh yüksəliyi daha da artsın.

Azərbaycan Milli Elmlər Akademiyasının Tarix İnstitutunun əməkdaşı Vaqif Abışov