Azərbaycan Milli Elmlər Akademiyasının Mərkəzi Elmi Kitabxanasında Nizami Gəncəvi adına Ədəbiyyat İnstitutu, TİKA, Bakı Yunus Emre İnstitutu, Türk Dil Qurumu və KÜNİB-in birgə təşkilatçılığı ilə "Türk dünyasında milli mücadilə və ədəbiyyat" mövzusunda simpozium keçirilib.

Simpoziumu giriş sözü ilə AMEA-nın vitse-prezidenti, Nizami Gəncəvi adına Ədəbiyyat İnstitutunun direktoru, akademik İsa Həbibbəyli açaraq Türkiyə ilə Azərbaycan arasında qardaşlıq və dostluq münasibətlərinin inkişafından danışıb. Akademik İsa Həbibbəyli bu cür tədbirlərin təşkilini ölkələrimiz arasındakı milli mücadilə tarixinə bir töhfə kimi qiymətləndirib. Həm Türkiyə Cümhuriyyətinin qurulmasında, həm Azərbaycan Xalq Cümhuriyyətinin xilasında soydaşlarımızın birgə mübarizəsini yüksək qiymətləndirib. Azərbaycanda fəalliyyət göstərən Türkiyə qurumları ilə Ədəbiyyat İnstitutu arasında keçirilən bu cür tədbirlərin xüsusi əhəmiyyətindən bəhs edib.

Daha sonra Bakı Yunus Emre İnstitutunun direktoru Cihan Özdemir Milli mücadilənin 100 illiyinə töhfə olaraq belə bir tədbirin keçirilməsi üçün təşkilatçılara təşəkkür edib. Bu işdə ilk tərəfdaş kimi Elmlər Akademiyasını seçdiklərini bildirib. O vurğulayıb ki, İsa Həbibbəyli hər zaman qardaşlıq məsələsini yalnız sözdə deyil, əməldə göstərən millət vəkili, akademik və bir ziyalıdır.

TİKA-nın Bakı proqram koordinatoru Teoman Tiryaki də təşkilatçılara və iştirakçılara təşəkkür edərək bu cür birgə fəaliyyətin önəmindən bəhs edib.

Türk Dil Qurumu başqan yardımcısı Feyzi Ersoyda hər zaman bu tərz toplantıların dəstəklənməsindən qürur duyduğunu bildirib. O qeyd edib ki, biz elə bir millətik ki, çin, alman, monqol və başqa xalqların tarixi türk tarixindən bəhs edilmədən yazıla bilməz. Böyük millətlərin hafizələri də böyük olur, ona görə də bir tariximizi unutmamalıyıq.

KÜNİB başqanı Ramazan Korkmaz çıxışında deyib ki, türklər ingilisləri yenincəyə qədər biz onları yenilməz bir ilah zənn edirdik. Ancaq biz onları Çanaqqalada sulara gömdük. Bu da ingilis mifini dağıtdı və türkün xilaskarlıq missiyasını sübut etdi. İndi də Türkiyə və Azərbaycan münasibətlərini sadəcə iki dövlətin əməkdaşlığı deyil, bütün dünyadakı məzlum insanların ümid yeri kimi səciyyələndirib. Həmçinin söyləyib ki, o zaman Bakının xilası üçün gəlib şəhid olmuşduq, indi gəlib Bakının inkişafına şahid olub sevinirik.

Azərbaycan-Asiya ədəbi əlaqələri şöbəsinin müdiri, professor Bədirxan Əhmədov simpoziumda "Azərbaycan poeziyasında milli istiqlal mücadiləsi" mövzusunda məruzə ilə çıxış edib. O bildirib ki, milli mücadilə həm Azərbaycan, həm də Türkiyə ədəbiyyatında geniş əks olunub. Bir məsələyə də xüsusi diqqət etmək lazımdır ki, mətbuatın o qədər də hakim olmadığı bir dönəmdə ədəbiyyat, xüsusən də poeziya mücadilədə çox böyük rol oynayıb.