Azərbaycanın Ukraynadakı səfirliyindən verilən məlumata görə, müəllif məqalədə XX əsrin ən dəhşətli faciələrindən biri olan Xocalı soyqırımının artıq dünya ölkələri tərəfindən tanındığını qeyd edərək, insanlığa qarşı törədilən vəhşiliyin beynəlxalq humanitar hüququn norma və prinsiplərinə zidd olduğunu vurğulayıb. Qeyd olunub ki, Xocalıda əhaliyə qarşı törədilən kütləvi qətlin əsas ideoloqlarından olan Ermənistanın üçüncü prezidenti Serj Sarkisyan britaniyalı jurnalist Tomas de Vaala müsahibəsində hər şeyi etiraf edib, “Xocalıdan əvvəl azərbaycanlılar düşünürdülər ki, ermənilər mülki insanlara qarşı əl qaldıra bilməzlər. Amma biz bu stereotipi sındıra bildik”, - deyə bildirib. Müəllif daha sonra vurğulayır ki, Ermənistanın Azərbaycana qarşı işğalçılıq siyasəti hələ də davam edir. Ermənistan 25 ildən artıqdır ki, Azərbaycan torpaqlarının 20 faizini işğal altında saxlayır.