“Ermənistanı 2018-ci ildə də çox ağır vəziyyət gözləyir. Bunun gətirdiyi iqtisadi problemlər isə etirazlarla nəticələnəcək”. Azadinform xəbər verir ki, bunu “İrs” partiyasının sədr müavini Armen Martirosyan çıxış edib. O qeyd edib ki, 2018-ci ildə Ermənistanda sosial-iqtisadi vəziyyətin pisləşməsi qaçılmazdır: “Bunun qarşısını almaq üçün hökumətin strateji planı yoxdur. Bu il də Ermənistan iqtisadiyyatının inkişafı sıfıra enəcək. Hazırkı rejimin hakimiyyətdə olduğu dövr ölkəni ancaq məhvə aparıb. Son 10 ildə 300 mindən çox vətəndaş və ya əhalinin 10 faizi ölkəni birdəfəlik tərk edib. Yoxsulluq həddində yaşayan vətəndaşların sayı isə 30 faizədək yüksəlib. Xarici borc 4 dəfə artaraq ümumi daxili məhsulun 60 faizi səviyyəsinə - ən təhlükəli həddə çatıb”. A.Martirosyan diqqəti ölkədəki siyasi vəziyyətə də yönəldib. O bildirib ki, hökumət ona qarşı çıxan fəalları “Sasna Srer” hərəkatı adı altında həbs edib: “Ona görə də “İrs” partiyası meydanda tək qalıb. Lakin buna baxmayaraq, fəal mitinqləri bərpa etmək iqtidarındadırlar. Bütün təzyiqlərə baxmayaraq, mart-apreldən etibarən yenidən ümumxalq itaətsizliyi aksiyalarına başlayacağıq”.