2001-ci il sentyabrın 11-də ABŞ-da baş vermiş dəhşətli terror hadisəsindən 25 il  ötür. Həmin gün səhər saatlarında Nyu-York səmasında görünən ilk təyyarə və ardınca baş verən hadisələr dünyanın gedişatını dəyişdi. Bir neçə saat ərzində ABŞ-ın ən tanınmış simvollarından biri olan Dünya Ticarət Mərkəzinin Əkiz Qüllələri dağıdıldı, 2977 insan həyatını itirdi. Bununla həm də beynəlxalq təhlükəsizlik anlayışı yeni mərhələyə qədəm qoydu.

Rəsmi açıqlanan məlumatda bildirilir ki, 2001-ci il sentyabrın 11-də səhər saatlarında "Boeing 767" tipli iki təyyarə Ümumdünya Ticarət Mərkəzinin Nyu-York şəhərindəki 110 mərtəbəli qoşa binalarına, "Boeing 757" tipli üçüncü təyyarə isə Vaşinqtonda yerləşən ABŞ Müdafiə Nazirliyinin (Pentaqon) binasına çırpılıb.

"Boeing 757" tipli dördüncü təyyarə isə Pitsburq şəhərindən 80 mil məsafədə yerə düşüb. "American Airlines" və "United Airlines" aviaşirkətlərinə məxsus həmin təyyarələrin terrorçu-kamikadzelər tərəfindən qaçırıldığı bildirilir.

Dördüncü təyyarənin ABŞ paytaxtındakı Kapitoli təpəsindəki Konqres binasına çırpılması nəzərdə tutulurdu. Lakin sərnişinlər terrorçuların hədəflərinə çatmasının qarşısını aldıqdan sonra təyyarə Pensilvaniyada qəzaya uğrayıb. Hücumlar nəticəsində 6000-dən çox insan yaralanıb. Qurbanlar arasında ABŞ vətəndaşları ilə yanaşı, 90-dan çox ölkənin vətəndaşları da olub. Əkiz Qüllələrdə olan insanların böyük hissəsi binaların dağılması nəticəsində həyatını itirib. Hücumların nəticələrinin aradan qaldırılması və axtarış-xilasetmə işləri aylarla davam etdi.

Terror aktı nəticəsində Nyu-York şəhərinə dəyən zərərin ümumi həcminin 36 milyard dollar olduğu açıqlanıb.