Mədəniyyət və Turizm Nazirliyi və Azərbaycan Dövlət Rəsm Qalereyası tərəfindən Muzey Mərkəzində “İRS”. Respublikanın sərvəti. Ölkəmizin tarix səhifələri qrafika və heykəltəraşlıq əsərlərində” adlı sərgi açılıb.

Tədbirdə çıxış edən mədəniyyət və turizm nazirinin müavini Ədalət Vəliyev bugünkü sərgidə Dövlət Rəsm Qalereyasının fondunda olan, indiyədək sərgi salonlarında, qalereyalarda, muzeylərdə sərgilənməyən əsərlərin təqdim edildiyini vurğulayıb. Qeyd edib ki, ekspozisiyada ustad rəssamlar və heykəltəraşların əsərləri nümayiş olunur.

Ölkəmizdə genişmiqyaslı tədbirlərin keçirildiyini söyləyən Ə.Vəliyev deyib ki, sərginin təşkilində əsas məqsəd milli incəsənətimizin nadir incilərinin geniş tamaşaçı auditoriyasına təqdim edilməsindən, turistlərə mədəni xidmət göstərilməsindən, eyni zamanda, Bakıda keçiriləcək Ümumdünya Mədəniyyətlərarası Dialoq Forumu, həmçinin IV İslam Həmrəyliyi Oyunları, “Formula-1” Avropa Qran-pri yarışının iştirakçılarının mədəni proqramının zənginləşdirilməsindən ibarətdir.

Nazir müavini, eyni zamanda, bu beynəlxalq səviyyəli tədbirlərin keçirildiyi müddətdə digər mədəniyyət ocaqlarında – teatrlarda, film, konsert və sərgi salonlarında mədəni proqramların təşkil ediləcəyini diqqətə çatdırıb.

Azərbaycan Rəssamlar İttifaqının sədri, Xalq Rəssamı Fərhad Xəlilov sərginin təşkilatçılarına təşəkkürünü bildirib. Qeyd edib ki, sərginin təşkili sənətkarlarımızın unudulmadığının əyani sübutudur.

Sonra qonaqlar sərgi ilə tanış olublar. Sərgidə 150 qrafika və 50 heykəltəraşlıq əsərləri nümayiş etdirilir.(Azərtac)