"4 oktyabr Azərbaycanın şanlı tarixinə qızıl hərflərlə yazılmış günlərdən biridir. Məhz bu tarixdə rəşadətli Azərbaycan Ordusu Ali Baş Komandan, cənab Prezident İlham Əliyevin rəhbərliyi ilə Cəbrayıl şəhərini erməni işğalından azad etdi. Cəbrayılın azadlığı, Vətən müharibəsinin ilk böyük strateji qələbələrindən biri olaraq xalqımızda ruh yüksəkliyi yaratdı və ordumuzun irəliləyişinə güclü təkan verdi". 

Bunu  millət vəkili Fatma Yıldırım deyib.  O, bildirib ki, Cəbrayıl zəfəri yalnız bir şəhərin geri alınması deyildi - bu, işğal altındakı torpaqlarımızın azad olunacağına olan inamın möhkəmləndirilməsi, 30 illik ədalətsizliyə son qoyulmasının başlanğıcı idi. Bu qələbə, lider–ordu–xalq birliyinin təntənəsi, Azərbaycanın siyasi və hərbi iradəsinin güclü təzahürü idi.

Cəbrayıl zəfəri, həm də düşmənin illərlə qurduğu “keçilməz müdafiə xəttinin” darmadağın edildiyi anlar idi. Bu Azərbaycan dövlətinin güclü siyasi və hərbi imkanlara malik olduğunu bütün dünyaya nümayiş etdirdi: 

"Bu gün Cəbrayıl yenidən dirçəlir. Böyük Qayıdış proqramı çərçivəsində şəhərdə və kəndlərdə genişmiqyaslı infrastruktur layihələri həyata keçirilir, yollar çəkilir, məktəblər, xəstəxanalar, sosial obyektlər inşa edilir. Cəbrayıl sakinləri illər sonra doğma torpaqlarına qayıdırlar və bu, dövlətimizin öz vətəndaşına olan yüksək diqqət və qayğısının göstəricisidir.

Azərbaycanın azad olunmuş ərazilərində aparılan quruculuq-bərpa işləri yalnız fiziki deyil, mənəvi və tarixi bərpa prosesidir. Cəbrayılın, Füzulinin, Şuşanın, Zəngilanın və digər bölgələrimizin hər qarışı bizim üçün müqəddəsdir və bu torpaqlara qayıdış, eyni zamanda, milli kimliyimizə, irsimizə və şəhidlərimizin ruhuna qayıdışdır.

Cəbrayılın azadlığı uğrunda canından keçən bütün şəhidlərimizə Allahdan rəhmət diləyir, qazilərimizə sağlıq və güc arzu edirik. Bu zəfər tarixi bizim birlik və qətiyyətimizlə yazıldı".