Bakıda Beynəlxalq Əmək Təşkilatı (BƏT) tərəfindən “Milli səviyyədə müəyyən edilmiş töhfələrdə ədalətli keçidin həlli” mövzusunda texniki seminar keçirilir.

Əmək və Əhalinin Sosial Müdafiəsi Nazirliyinin (ƏƏSMN) İctimaiyyətlə əlaqələr şöbəsindən verilən məlumata görə, BƏT və aidiyyəti dövlət qurumlarının, sosial tərəfdaşların nümayəndələrinin iştirak etdiyi tədbir yaşıl iqtisadiyyata ədalətli keçid üzrə milli səviyyədə töhfələrin hazırlanma prosesi və ölkəmizdə ədalətli keçidə yönəlmiş əsas irəliləyişlərin müzakirəsi məqsədi daşıyıb.

ƏƏSMN-in Əmək siyasəti şöbəsinin müdiri Fuad Heydərov, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalov, Azərbaycan Həmkarlar İttifaqları Konfederasiyasının sədrinin müşaviri Fuad Ələkbərov seminarın açılışında çıxış ediblər.

Yaşıl iqtisadiyyata ədalətli keçid prosesində insan kapitalının, yaşıl iş yerləri və bacarıqların inkişafı, layiqli əməyin təminatı məsələlərinin əhəmiyyətindən bəhs olunub. Bu sahələrdə milli səviyyədə töhfələr olaraq aparılan işlər və əldə edilən uğurlar qeyd olunub.

BƏT-in Layiqli Əməyə Texniki Dəstək Qrupunun Şərqi Avropa və Mərkəzi Asiya ölkələri üzrə ofisinin direktoru Mixail Puşkin videoformatda çıxışında ədalətli keçidin əmək və məşğulluq sahələri üzrə vacib prinsiplərini diqqətə çatdırıb. BƏT-in Azərbaycan üzrə milli koordinatoru Yaşar Həmzəyevin moderatorluq etdiyi seminarda Azərbaycanda yaşıl iqtisadiyyata ədalətli keçid üzrə əsas irəliləyişlər, milli səviyyədə müəyyən olunmuş töhfələrin hazırlanma prosesi və digər mövzularda çıxışlar edilib.

Ölkəmizdə yaşıl iqtisadiyyata keçid dövrünə xas olan işçi qüvvəsinin formalaşdırılması üçün aparılan işlər diqqətə çatdırılıb. Sosial müdafiə sisteminin gücləndirilməsi, əmək, məşğulluq və sosial müdafiə sahələrində xidmətlərin rəqəmsallaşdırılması sahəsində son illər əldə olunan mühüm uğurlar qeyd edilib.

Seminarda, habelə “Hər kəs üçün ədalətli keçid” anlayışı, milli səviyyədə müəyyən olunmuş töhfələrin hazırlanması və həyata keçirilməsində onun əhəmiyyəti, BƏT tərəfindən Azərbaycanda həyata keçirilən tədbirlər barədə təqdimatlar edilməsi və mövzuya dair müzakirələr aparılması nəzərdə tutulub.