Azərbaycan - Türkiyə münasibətlərini "Bir millət, iki dövlət, bir ordu şəklində" də ifadə edə bilərik. İki dövlət arasında bir çox sahələrdə inkişaf etmiş əlaqələr var. 1991-ci ildən etibarən Azərbaycan ilə Türkiyə arasında çox sayda hərbi sahədə anlaşmalar imzalanıb. Azərbaycan Ordusu NATO-nun ikinci ən böyük ordusu olan Türkiyə Ordusunun kodeksinə uyğun şəkildə qurulub. Qarabağ Zəfərindən sonra 2020-ci ildə iki ölkə rəsmi olaraq müttəfiq elan edilib. Şuşa Bəyannaməsində Azərbaycan ilə Türkiyənin hərbi məsələlərdə bir-birinə yardım edəcəyi qeyd olunub. Fact-info.az xəbər verir ki, bunu Türkiyənin Burdur Mehmet Akif Ersoy Universitetinin müəllimi, xarici siyasət məsələləri üzrə şərhçi Esma Özdaşlı "Yeni geosiyasi reallıqların Türkiyə - Azərbaycan münasibətləri üçün yaratdığı təhdidlər və fürsətlər" adlı dəyirmi masada "Yeni geosiyasi reallıqlar və Azərbaycan - Türkiyə münasibətləri” mövzusunda təşkil edilən müzakirədə bildirib.

Zəngəzur dəhlizini barış dəhlizi olaraq gördüyünü bildirən E.Özdaşlı Azərbaycanın hər zaman alternativlərinin olduğunu vurğulayıb: "Zəngəzur Azərbaycanın tarixi torpağıdır. Azərbaycanın haqq davasında daim onun yanındayıq. Ermənistan bölgənin ən zəif inkişaf etmiş ölkəsi hesab olunur. Eyni zamanda, Cənubi Qafqazın hərbi baxımdan ən zəif ölkəsi də Ermənistandır. Ermənistan Türk dünyasının güclənməsindən narahatlıq keçirir. Bütün hallarda, biz Ermənistanın provokasiyalarını qəbul etmirik".