Xalqımızın Ümummilli Lideri Heydər Əliyevin müəyyənləşdirdiyi enerji strategiyasının Azərbaycan Prezidenti İlham Əliyev tərəfindən dövrün reallıqlarına uyğun formalaşdırılaraq müvəffəqiyyətlə davam etdirilməsi ölkəmizin yeni inkişaf mərhələsinə qədəm qoymasını, tarixi zəfərlərimizin əldə olunmasını, respublikamızın beynəlxalq mövqelərinin daha da möhkəmləndirilməsini təmin edib. Azərbaycan şaxələndirilmiş ixrac-nəql marşrutları, strateji əhəmiyyətli enerji layihələri ilə regionun və Avropanın enerji təhlükəsizliyinin ayrılmaz tərkib hissəsinə çevrilib.

Bu fikirləri Milli Məclisin deputatı Mircəlil Qasımlı bildirib.

Dünyanın ən nəhəng və mürəkkəb layihələrindən olan Cənub Qaz Dəhlizinin bu gün Avropanın enerji təhlükəsizliyində strateji önəm kəsb etdiyini vurğulayan deputat qeyd edib ki, Azərbaycanın təşəbbüsü və iştirakı ilə reallaşdırılan Cənub Qaz Dəhlizi və onun əsas seqmentləri olan TANAP və TAP Azərbaycan qazının Avropa bazarına nəqlini uğurla təmin edir. Azərbaycan Prezidentinin qətiyyəti və müdrik rəhbərliyi ilə həyata keçirilən bu layihənin uğurla icrasında Cənub Qaz Dəhlizi Məşvərət Şurasının iclasları mühüm rola malikdir. Bu platforma tərəfdaşlarla birgə səmərəli müzakirələrin aparılmasına, mühüm qərarların qəbul olunmasına dəyərli töhfə verib.

“Məşvərət Şurasının son iclasında dövlətimizin başçısı İlham Əliyevin də qeyd etdiyi kimi, bu gün enerji təhlükəsizliyi ölkələrin milli təhlükəsizliyinin ayrılmaz hissəsidir. Azərbaycanın ötən illər ərzində tərəfdaşlarla birgə icra etdiyi nəhəng layihələr bu gün qlobal müstəvidə baş verən hadisələr fonunda regionun, Avropanın enerji təhlükəsizliyinə mühüm töhfə verir”, - deyə deputat vurğulayıb.

Avropa İttifaqının ölkələrinin Azərbaycan ilə enerji sahəsində əməkdaşlığa böyük önəm verdiyini söyləyən Mircəlil Qasımlı bildirib ki, 2022-ci ildə Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumunun imzalanması ilə Azərbaycandan İttifaq ölkələrinə ixrac edilən qaz həcmlərinin ikiqat artırılması nəzərdə tutulurdu. Ötən müddətdə bu istiqamətdə mühüm nailiyyətlər əldə edilib. Bu gün artıq 10-u Avropa ölkəsi olmaqla, 12 ölkə Azərbaycan qazı ilə təchiz edilir. Bu, olduqca mühüm nailiyyətdir.

Bakının ötən ilin noyabrında COP29 kimi mötəbər beynəlxalq tədbirə uğurla ev sahibliyi etdiyini söyləyən deputat qeyd edib ki, Azərbaycanın 2030-cu ilə qədər “Təmiz ətraf mühit və yaşıl artım ölkəsi”nə çevrilməsi sosial-iqtisadi inkişafa dair beş milli prioritetdən biri kimi müəyyənləşdirilib. Artıq bu istiqamətdə uğurlu fəaliyyət həyata keçirilir. Bu çərçivədə işğaldan azad edilmiş Qarabağ və Şərqi Zəngəzur iqtisadi rayonlarının, eləcə də Naxçıvan Muxtar Respublikasının yaşıl enerji zonasına çevrilməsi məqsədilə davamlı işlər görülür.

Eyni zamanda, Azərbaycan dünyanın nüfuzlu enerji şirkətləri ilə birgə ölkəmizdə bərpaolunan enerji layihələrinin icrası istiqamətində mühüm fəaliyyətlər həyata keçirir. Həmçinin ölkəmiz tərəfdaşlarla birgə mühüm beynəlxalq əhəmiyyətli yaşıl enerji layihələrinə də xüsusi diqqət ayırır. Bu xüsusda, əminliklə deyə bilərik ki, Azərbaycanın təşəbbüsü ilə həyata keçirilən enerji layihələri etibarlı tərəfdaş kimi ölkəmizin rolunu daha da möhkəmləndirəcək.