“Azərbaycanla Qazaxıstan arasında ticarət dövriyyəsinin həcminin 1 milyard dollara (hazırda 533 milyard dollar təşkil edir) çatdırılması hədəflənib.

Fact-info.az xəbər verir ki, bu sözləri “The Astana Times” qəzetinə müsahibəsində Azərbaycanın Qazaxıstandakı səfiri Ağalar Atamoğlanov deyib.

Bildirilib ki, 2023-cü ildə Bakı-Tbilisi-Ceyhan boru kəməri vasitəsilə nəql edilən Qazaxıstan neftinin həcmi 1,3 milyon ton təşkil edib ki, bu da 2022-ci illə müqayisədə 5,5 dəfə çoxdur. 2024-cü ildə bu rəqəm 1.5 milyon tona çatıb.

Səfir xüsusilə Orta Dəhlizin (Trans-Xəzər Beynəlxalq Nəqliyyat Marşrutu) əhəmiyyətini vurğulayıb. Onun sözlərinə görə, 2024-cü ilin ilk 10 ayı ərzində bu marşrutla yükdaşımaların həcmi 68 faiz artaraq, 3,8 milyon tona çatıb. Xüsusilə Çindən konteyner daşımalarının həcmi ötən il təxminən 26 dəfə artıb.