Transxəzər Beynəlxalq Nəqliyyat Marşrutunda (TBNM, Orta Dəhliz) Litvanın qarşısında böyük imkanlar açacaq.

Fact-info.az-ın məlumatına görə, bu barədə Trend-ə Litvanın Qazaxıstandakı səfiri Eqidiyus Navikas deyib.

Navikasın sözlərinə görə, Litva Qazaxıstanın öz ticari marşrutlarının diversifikasiyası üzrə planlarını təqdir edir və bu prosesdə aktiv iştirak edir.

Səfir qeyd edib ki, Litva TRASECA (Avropa-Qafqaz-Asiya nəqliyyat dəhlizi) hökumətlərarası komissiyanın assosasiya olunmuş üzvüdür.

"2023-cü ilin iyun ayında Qazaxıstanın "KAZLOGISTICS" Nəqliyyatçılar İttifaqı və Litva Sənayeçilər Konfederasiyası, eləcə də "Litva Dəmir Yolları" Səhmdar Cəmiyyəti və "Klaypeda Dövlət Dəniz Limanının Müdirliyi" TBNM-nin logistika potensialının inkişafına dəstək məqsədilə əməkdaşlıq haqqında memorandum imzalayıblar. Fikrimcə, "Orta Dəhliz" layihəsində iştirak Litva üçün böyük imkanlar açacaq, o cümlədən Asiyadan yükləri Baltik və Skandinaviya regionlarına yüklər nəql etmək imkanı açacaq", - deyə Navikas əlavə edib.

Qeyd edək ki, Orta Dəhliz Çin və Aİ ölkələrininin konteynerlərlə dəmir yolu yük daşımaları şəbəkələrini Mərkəzi Asiya, Qafqaz, Türkiyə və Şərqi Avropa ölkələri vasitəsilə birləşdirir.

Çoxtərəfli, multimodal nəqliyyat infrastrukturu Xəzər dənizi və Qara dənizin bərə terminallarını Çin, Qazaxıstan, Azərbaycan, Gürcüstan, Türkiyə, Ukrayna və Polşanın dəmir yolu sistemləri ilə birləşdirir.

Orta Dəhliz Çindən Türkiyəyə, eləcə də Avropa ölkələrinə və əks istiqamətdə yük axınının artmasına səbəb olur.

Bu dəhlizlə hərəkət edən qatarlar yükləri Çindən Avropaya orta hesabla 20-25 gün ərzində çatdırır və bu qeyd olunan nəqliyyat dəhlizinin əsas üstünlüklərindən biridir.