“TEKNOFEST Azərbaycan” tarixdə təkcə texnoloji yeniliklərin nümayişi deyil, eyni zamanda, Azərbaycanın öz gücünü dünyaya yeni formada nümayiş etdirmək fürsəti kimi qalacaq. Bu festival Azərbaycan və Türkiyənin “Bir millət, iki dövlət” fəlsəfəsinə söykənərək müdafiə sənayesi sahəsində birgə addımlar atması üçün yeni təməllər ortaya çıxaracaq.

Bu fikirləri AZƏRTAC-a açıqlamasında ehtiyatda olan türkiyəli general Yücel Karauz bildirib.

Azərbaycan son onillikdə bir sıra mötəbər beynəlxalq tədbirlərə, idman yarışlarına məharətlə ev sahibliyi etdiyini diqqətə çatdıran general Yücel Karauz deyib: “TEKNOFEST Azərbaycan” Can Azərbaycanın strateji inkişaf modelinin mühüm məqamlarının tanıdılması üçün böyük fürsət yaradacaq. Eyni zamanda, azərbaycanlı gənclərin elm və texnikaya, yüksək texnologiyalara, xüsusilə dəqiq elmlərə olan həvəsi artacaq. Azərbaycan xalqı bu festival çərçivəsində yenə də bütün dünyaya birlik mesajını çatdıracaq. Əminəm ki, Azərbaycan xalqı “Qarabağ Azərbaycandır!” şüarı ilə üçrəngli milli bayrağa olan tükənməz sevgisi və məhəbbəti ilə bütün dünyanı yenidən heyrətləndirəcək”.

General Yücel Karauz əminliklə bildirib ki, 44 günlük Vətən savaşında rəşadətli Qələbənin qazanılmasın böyük töhfələr verən “Bayraktar”lar “TEKNOFEST Azərbaycan” çərçivəsində bütün göstəriciləri ilə dövlətlərimizin və xalqlarımızın birliyini və qardaşlığını yenidən nümayiş etdirəcək.

Qeyd edək ki, “TEKNOFEST Azərbaycan” Rəqəmsal İnkişaf və Nəqliyyat Nazirliyinin təşkilatçılığı ilə bu il mayın 26-29-da Bakıda keçiriləcək. Beynəlxalq brendə çevrilən “TEKNOFEST”in keçirilməsində əsas məqsəd aviasiya, kosmik sənaye, rəqəmsal iqtisadiyyat, təhsil və digər istiqamətlərin gənclər arasında təbliği, bu sahələrdə sahibkarlığın təşviq edilməsi, festival çərçivəsində təşkil olunan yarışlar vasitəsilə gənc mühəndislərin bilik və bacarıqlarının üzə çıxarılması, eləcə də milli texnologiyaların geniş ictimaiyyətə təqdim edilməsidir.