Avrasiya İqtisadi Əlaqələr Dərnəyinin (EkoAvrasiya) saytında və aylıq jurnalında yayılan məqalədə bildirilir ki, Ermənistanın seysmoloji bölgədə yerləşən “Metsamor” Atom Elektrik Stansiyasının Azərbaycan, Türkiyə və İran da daxil olmaqla, yaratdığı təhlükənin coğrafiyası Ermənistan ərazisindən xeyli böyükdür.

Diqqətə çatdırılır ki, 2016-cı il martın 31-dən aprelin 1-dək Vaşinqtonda keçirilmiş IV Nüvə Təhlükəsizliyi Sammitindən sonra bəşəriyyətin nüvə təhlükəsizliyi məsələsi beynəlxalq ictimaiyyət üçün daha aktual mövzuya çevrilib.

Məqalədə Prezident İlham Əliyev 2012-ci ilin martında keçirilmiş Seul Sammitindəki çıxışından fikir yer alıb: “Azərbaycan Ermənistanın 1976-cı ildə fəaliyyətə başlamış və hazırda köhnəlmiş “Metsamor” Atom Elektrik Stansiyasından olduqca narahatdır. “Metsamor” stansiyası bütöv region və yaxınlıqda olan qonşular üçün potensial fəlakət mənbəyidir”.

1986-cı il aprelin 26-da Ukraynada baş vermiş Çernobıl faciəsinin acı nəticələri ilə Ermənistan hökumətinin istismar müddətini 2026-cı ilədək uzatmaq istədiyi “Metsamor” stansiyasının yaratdığı təhlükələr arasında müqayisələr aparan müəlliflər əsaslandırırlar ki, Ermənistan rəhbərliyinin iddiaları ilə imkanları arasındakı uyğunsuzluq “Metsamor” AES-in mövcud radioaktiv təhlükə mənbəyi kimi qalmasının əsas səbəbidir.( AZƏRTAC)