Zviad Kvaçantaridze həmkarlarına müraciət edərək deyib ki, heç kim bizə bədxah qonşu adını qazandıracaq təxribatçı çağırışlara uymamalıdır.

O deyib: “Bu günlərdə Qafqazda dərin və yatmış bir münaqişənin yenidən alovlanmasına cəhd olundu. Xoşbəxtlikdən beynəlxalq səylər nəticəsində bunun qarşısı alındı. Unutmamalıyıq ki, bizim ətrafımızdakı bəzi qüvvələr Qafqazda daim münaqişələrin yaranmasında maraqlıdırlar və onlar istəyirlər ki, Cənubi Qafqazın bütün ölkələri bu münaqişələrə cəlb olunsunlar. Mən bir daha bəyan edirəm ki, heç kim bədxah qonşu olmamağımız üçün təxribata uymamalıdır”.

Qeyd edək ki, Gürcüstan parlamentinin aprelin 13-də keçirilən iclasında Axalkalkidən olan erməni deputat Samvel Petrosyan qondarma “erməni soyqırımı”nın tanınmasını təklif edib. Bəzi deputatların sərt cavabından sonra Petrosyanın təklifi müzakirədən çıxarılıb.

Parlamentdəki çoxluğun lideri Z.Kvaçantaridzenin cavabı bir daha göstərir ki, Gürcüstan parlamenti yalançı erməni iddialarını müzakirə etmək fikrində deyil. (AZƏRTAC)