96 saylı Goranboy-Naftalan seçki dairəsindən deputat Anar Məmmədov karantin rejimi ilə əlaqədar olaraq seçicilərlə onlayn qəbul keçirib. 22 nəfər seçici ilə onlayn bağlantı vasitəsilə qoşulan deputat ilk öncə karantin rejimi ilə bağlı seçicilərinə xəbərdarlıq edib, karantin rejiminin qaydalarına və tələblərinə tam şəkildə riayət etmələrini, məsuliyyətlə davranmalı, qaydalara ciddi əməl etməklə həm özlərini, həm də yaxınlarını xəstəlikdən qorumalı və ətrafdakıları risk altına qoymamağı diqqətə çatdırıb.

Sonra seçicilər öz xahişlərini bildiriblər. Müraciətlər əsasən bir neçə kəndə internet xətlərinin çəkilməsi, işıq naqillərinin dəyişdirilməsi, kənd yerlərində torpaqların suvarma və meliorasiya təminatının yaxşılaşdırılması və içməli su təchizatının yaxşılaşdırılması ilə əlaqədar olub.

Deputat qəbul iştirakçılarının çoxsaylı suallarını da cavablandırıb və sonra seçicilərini əmin edib ki, bundan sonra onlarla sıx təmasda olacaq. Onun sözlərinə görə, seçicilərini narahat edən məsələləri daim diqqət mərkəzində saxlayır və onların həlli üçün müvafiq addımlar atır. Anar Məmmədov deyib ki, seçicilərin ona ünvanladığı müraciətləri aidiyyatı qurumlara göndərməklə yanaşı, onların icra vəziyyətini də daim diqqətdə saxlayır.

Fact-info.az