Müstəqillik yolunda inamla irəliləyən Azərbaycan müstəqil siyasət yürüdərək öz gücünü nümayiş etdirir. Dünya dövlətlərinin COVID-19 pandemiyası ilə mübarizəsi fonunda biz bunun bir daha şahidi olduq. Prezident İlham Əliyevin koronavirus pandemiyasına qarşı üç istiqamətdə irəli sürdüyü mübarizə strategiyası öz müsbət nəticəsini verdi və ölkəmiz bu kontekstdə birincilərdən olmağı bacardı. Dövlətimizin başçısı bu çətin şəraitdə vətəndaşının yanında olduğunu əyani şəkildə sübut etdi və seçim məqamında məhz ona üstünlük verdi.

Bu fikirləri AZƏRTAC-a açıqlamasında politoloq, siyasi ekspert Elxan Ələsgərov deyib.

Məhz dövlətimizin başçısının uzaqgörənliyi və qabaqlayıcı tədbirlər görməsi nəticəsində ölkəmizdə vəziyyətin sabitliyinin qorunduğunu bildirən politoloq deyib: “Azərbaycan Prezidentinin mübarizə strategiyasında əhalinin həyatı və sağlamlığının qorunması və sosial müdafiəsinin təmin olunması, eləcə də iqtisadi fəallığın inkişaf etdirilməsi ana xətt olaraq müəyyən edilib. Məhz bu strategiyası sayəsində Azərbaycan bu ümumi bəlanın doğurduğu itkiləri minimuma endirməyi bacardı və hazırda vəziyyətə nəzarət olunur. Fikirləşəndə ki, dünyanın inkişaf etmiş və əhalisi bizdən milyonlarla artıq olan qabaqcıl ölkələrdə vəziyyət nəzarətdən çıxıb, artıq şərhə ehtiyac yoxdur. Bunun nəticəsidir ki, Ümumdünya Səhiyyə Təşkilatı (ÜST) tərəfindən koronavirusla mübarizə sahəsində Azərbaycanda görülmüş işlərə yüksək qiymət verildi və qurumun baş direktoru Tedros Adhanom Qebreyesus COVID-19 pandemiyasının təsirinin və miqyasının məhdudlaşdırılması istiqamətində ölkəmizin təcrübəsini başqa ölkələrə nümunə göstərdi”.

Sosial sahənin dövlət siyasətinin prioritetlərindən biri olduğunu diqqətə çatdıran siyasi ekspert Azərbaycan vətəndaşının rifah halının yaxşılaşdırılmasının Prezident İlham Əliyevin daim diqqət mərkəzində olduğunu deyib. Bildirib ki, dövlətimiz hər zaman olduğu kimi, dünyanın bəlasına çevrilən koronavirus pandemiyası dövründə də insanların həyat şəraitinin təmin edilməsini, onların güzəranının yaxşılaşdırılmasını diqqətdə saxlayır. Dövlətin dəstək proqramı çərçivəsində koronavirus pandemiyasının vətəndaşlara təsirlərinin minimuma endirilməsi və iqtisadiyyatın dayanıqlığını təmin edilməsi mərhələli şəkildə həyata keçirilir.

E.Ələsgərov bildirib ki, Prezident İlham Əliyev aprelin 14-də videokonfrans şəkildə keçirilən iqtisadi müşavirədə, eləcə də İqtisadiyyat və Əmək və Əhalinin Sosial Müdafiə nazirliklərinin rəhbərləri ilə onlayn görüşündə pandemiyanın təsir etdiyi bütün vətəndaşlarımızın sosial təminatının gücləndirilməsi ilə bağlı göstəriş və tapşırıqlarını verdi. Məhz Prezidentin qərarı ilə işsiz insanlara müavinətin ödənilməsi artıq 200 min deyil, 600 min nəfəri əhatə edəcək. Politoloq dövlətimizin pandemiya dövründə təsdiq etdiyi paketlərdən sahibkarlıq subyektləri və fərdi sahibkarların yararlanacağını diqqətə çatdırıb.

“Azərbaycan dövləti sosial paket layihəsi çərçivəsində ünvanlı sosial yardım və özünüməşğulluq proqramlarının genişləndirilməsinə mühüm əhəmiyyət verir. Belə ki, 2020-ci ildə 12 min ailənin özünüməşğulluq proqramına cəlb edilməsi üçün işlər görülür. Bunun üçün İşsizlikdən Sığorta Fondundan 70 milyon manat vəsait ayrılıb. Bundan başqa, həssas təbəqələrin sosial müdafiə tədbirlərinin gücləndirilməsi işi də diqqətdə saxlanılır. Dövlət Sosial Müdafiə Fondunun 2019-cu il üzrə yaranmış 200 milyon manat ehtiyatı əhaliyə sosial ödənişlərin davamlılığının təmin edilməsinə yönəldilib. Bu ödənişlər 2,3 milyon nəfəri əhatə edir. Bütün bu deyilənlər sosial sahədə çalışan vətəndaşlarımızın rifahına hesablanıb və dövlətin bu mənada qayğısının daha bir təzahürüdür”.