Koronavirus pandemiyasına qarşı mübarizədə Azərbaycanın dəstəyini nümayiş etdirmək məqsədilə aprelin 11-də Heydər Əliyev Mərkəzinin binası üzərinə Türkiyə bayrağının bizim ölkənin musiqisinin müşayiətilə videoproyeksiya olunmasını böyük sevgi ilə qarşıladıq. Bunun ardınca Ankaradakı əzəmətli Atakule qülləsinin üç rəngli Azərbaycan bayrağının rəngləri ilə işıqlandırılması, qüllənin zirvəsində ulu öndər Heydər Əliyevin “bir millət, iki dövlət” kəlamının, onun ardınca isə “Can Azərbaycana sevgilərlə” şüarının üç rəngli bayrağın rəngləri fonunda hərəkət etməsi bir daha göstərdi ki, Ümummilli Liderimizin şəxsiyyəti xalqlarımız tərəfindən əbədiyyətə qədər uca tutulacaq. Hesab edirəm ki, Azərbaycan və Türkiyə bayraqlarına qarşılıqlı ehtiram sarsılmaz birliyin rəmzidir.

Bu fikri AZƏRTAC-a açıqlamasında ifadə edən “Mərmərə Qrupu” Strateji və Sosial Araşdırmalar Vəqfinin sədri, professor Akkan Suver bildirib.

O deyib: “Azərbaycan bütün dünyanı sürətlə cənginə alan məlum pandemiya ilə mübarizədə sözün əsl mənasında insanlıq tarixinə qızıl hərflərlə yazılan mövqe nümayiş etdirdi. Bununla bağlı atılan hər bir addımda xalqın, ölkənin və dövlətin maraqları bərabər şəkildə qorundu. Həmçinin Azərbaycan Prezidenti, Türkdilli Dövlətlərin Əməkdaşlıq Şurasının sədri İlham Əliyevin təşəbbüsü ilə aprelin 10-da Türk Şurasının videokonfrans vasitəsilə fövqəladə Zirvə görüş keçirildi. Zirvə görüşündə nümayiş olunan mövqe ümumbəşəri dəyərləri ilə tarixə düşdü. Türk Şurası yaranandan bəri ən böyük tərkiblə dünya ictimaiyyətinə birlik və həmrəylik töhfələri verdi”.