Masallı şəhər Heydər Əliyev Mərkəzində Masallı rayon Gənclər və İdman İdarəsinin, Təhsil şöbəsinin və Heydər Əliyev Mərkəzinin birgə təşkilatçılığı ilə “26 fevral – Xocalı Soyqırımı Günü” nə həsr olunmuş “Xocalı qətliamı” filmi nümayiş etdirilib.

Tədbirdə əvvəlcə Xocalı faciəsi qurbanlarının xatirəsi bir dəqiqəlik sükutla yad edilib. Ardından Masallı rayon Gənclər və İdman İdarəsinin rəisi Camal Manafov çıxış edib, Xocalı qətliamının Azərbaycan xalqının tarixində erməni faşistlərinin insan təfəkkürünə sığmayan vəhşiliklərinin qanlı izi olduğunu söyləyib: “Faciəni əks etdirən kadrlar hər an bu dəhşətli mənzərəni seyr edənləri sarsıdır, sızladır. Meşələrdə əli, ayağı, burnu, qulağı donan, əsir və girov düşən qoca və uşaqların bizim könüllü milli müdafiə əsgərlərinə təhvil verilməsi səhnəsi yüz il bundan sonra da ən möhkəm iradəli insanları belə sarsıdacaq, yandırıb-yaxacaq. Körpələri meşələrdə donan, çöhrələrinə ölümün rəngi çökən zavallı anaların ağrılara dönən fəryadı heç vaxt heç kimin yaddaşından silinməyəcək”.

Masallı şəhər Heydər Əliyev Mərkəzinin direktoru Dilbər İbayevanın, Təhsil şöbəsinin metodkabinetin müdiri Bəybala Xəlilovun çıxışlarında Azərbaycan tarixinin acı səhifələrindən biri olan Xocalı soyqırımı barədə söhbət açılıb.

Qeyd edilib ki, 1992-ci il fevralın 25-dən 26-na keçən gecə Ermənistan hərbi birləşmələri əhalisi tamamilə azərbaycanlılardan ibarət olan Xocalını bir gecədə darmadağın edib, şəhərin dinc əhalisini etnik azərbaycanlı olduqları üçün qətliama məruz qoyub və ermənilər insanlara qarşı inanılmaz vəhşiliklər törədiblər. Törədilən qətliamın misli görünməmiş qəddarlıq və tarixdən silinməz bir soyqırımı olduğu xüsusilə diqqətə çatdırılıb.

Sonra “26 fevral – Xocalı Soyqırımı Günü” nə həsr olunmuş “Xocalı qətliamı” filmi nümaiş olunub