Yanvarın 11-də Sabunçu rayonunun Pirşağı qəsəbəsindəki 112 saylı məktəbdə məktəbin məzunu görkəmli neftçi-alim, Azərbaycan Respublikası Dövlət Neft Şirkətinin birinci vitse-prezidenti, geologiya-mineralogiya elmləri doktoru, akademik Xoşbəxt Yusifzadənin 90 illik yubileyi münasibəti ilə tədbir keçirilmişdir. Tədbirdə SOCAR rəhbərliyinin nümayəndələri, Sabunçu rayon İcra Hakimiyyətinin icra başçısı Adil Vəliyev, qəsəbə sakinləri, yubilyarın yaxınları iştirak etmişlər.

Azərbaycan Respublikası Prezidentinin "Xoşbəxt Yusifzadənin 90 illik yubileyinin keçirilməsi haqqında" 2009-cu il 19 dekabr tarixli sərəncamına əsasən təşkil edilmiş mərasimdə yubilyarın həyat və fəaliyyəti haqqında iştirakçılara məlumat verilmiş, sonra yeni ekranlaşdırılmış “Azərbaycan neftçisinin rəmzi – akademik Xoşbəxt Yusifzadə” filmi nümayiş etdirilmişdir. Filmdə akademik Xoşbəxt Yusifzadənin keçdiyi həyat yolundan bəhs edilmişdir.

İlk olaraq söz akademikin məzunu olduğu 112 saylı məktəbin direktoru Xədicə Babayevaya verilmiş, o məktəbin tarixi və tanınmış məzunlarından bəhs etmiş, bu gün də məktəbi hər bir şagirdi üçün akademik Xoşbəxt Yusifzadənin bir ideal olduğunu bildirmişdir. SOCAR-ın vitse-prezidenti Xalik Məmmədov yubiliyarın bir neftçi kimi məziyyətlərindən danışmış, qeyd etmişdir ki, Xoşbəxt müəllimin həyatda qazandığı uğurların rəhni gündəlik fədakar əməkdir. Tədbirdə Yusifzadələr ailəsinin yaxın dostu Akif Quliyev, qonşuları şair Oktay Sultan, Pirşağı poliklinikasının baş həkimi Ramidə İbrahimova çıxış edərək akademik Xoşbəxt Yusifzadə ilə bağlı fikirlərini tədbir iştirakçıları ilə bölüşmüşlər.

Tədbirdə Azərbaycan klasssiklərinin musiqiləri səsləndirilmişdir.