SOCAR-ın büdcə ödənişləri artan xətt üzrə inkişaf edir. SOCAR 2019-cu ilin yanvar-iyun ayları ərzində dövlət büdcəsinə 741 milyon 326 min manat ödəmə edib. Bu ötən ilin müvafiq dövrü ilə müqayisədə 2,7% və ya 19 milyon 705 min çoxdur.

Azərbaycan Respublikasının Prezident İlham Əliyev cənablarının göstərdiyi strateji kursu rəhbər tutaraq SOCAR ötən 10 il ərzində idarəetmə, maliyyə, kadr siyasəti, təchizat – bir sözlə bütün sahələrdə islahatlar həyata keçirib, əməliyyat effektivliyini yüksəldib. SOCAR bu məqsədlə ötən onillikdə biznes portfelini əhəmiyyətli dərəcədə şaxələndirərək, yeni biznes sahələrinə və yeni ölkələrə sərmayələr yatırdı, qlobal bazarları kəşf etməyə başladı. Nəticədə bu gün dünya üzrə aparıcı enerji şirkətlərindən birinə və Azərbaycanın qlobal brendinə çevrildi.

Bu gün artıq SOCAR qlobal enerji layihələrində dəyər zənciri üzrə bütün mərhələlərə investisiya qoyur, şaquli inteqrasiya strategiyası ilə gəlirlərini optimallaşdırır və ölkə iqtisadiyyatına əlavə dəyər qazandırır. Elə bunun nəticəsidir ki, SOCAR 2018-ci ildə əldə etdiyi gəlirlərin 94 faizini xarici bazarlardan qazanıb. Xatırladaq ki, 2009-cu ildə SOCAR öz gəlirlərinin yalnız 34%-ni xarici bazarlardan təmin edirdi.