ATƏT-in fəaliyyətdə olan sədri, Slovakiyanın xarici işlər naziri Miroslav Layçak martın 29-da Ermənistan-Azərbaycan Dağlıq Qarabağ münaqişəsinin nizama salınması üzrə Azərbaycan Prezidenti İlham Əliyev və Ermənistanın baş naziri Nikol Paşinyan arasında Vyanada keçirilən görüşlə bağlı bəyanat verib. AZƏRTAC ATƏT-in rəsmi saytına istinadla xəbər verir ki, M.Layçak ATƏT-in Minsk qrupu həmsədrlərinin iştirakı ilə Avstriyanın paytaxtında keçirilən görüşdəki konstruktiv ab-havanı alqışladığını qeyd edib. Bəyanatda deyilir: “ATƏT-in fəaliyyətdə olan sədri, Slovakiyanın xarici işlər naziri Miroslav Layçak dünən (martın 31-də-AZƏRTAC) Bratislavada ATƏT-in Minsk qrupunun həmsədrləri (İqor Popov, Rusiya Federasiyası; Stefan Viskonti, Fransa və Endrü Şöffer, Amerika Birləşmiş Ştatları) və ATƏT-in fəaliyyətdə olan sədrinin şəxsi nümayəndəsi Anjey Kaspşik ilə görüşüb. ATƏT-in fəaliyyətdə olan sədrinə Minsk qrupunun iştirakı ilə Azərbaycan Prezidenti İlham Əliyev və Ermənistanın baş naziri Nikol Paşinyan arasında keçirilən ilk görüş barədə məlumat verilib”. ATƏT-in fəaliyyətdə olan sədri danışıqların konstruktiv ab-havasını və liderlərin münaqişənin sülh yolu ilə həlli istiqamətində gələcəkdə konkret addımlar atılması niyyətlərini alqışlayıb. Layçak deyib “Biz bu məsələdə nikbinik və prosesi, eyni zamanda, liderlərin atəşkəs rejiminin möhkəmləndirilməsi və humanitar sahədə addımlar atılması səylərini tam dəstəkləyirik”.