Milli Qəhrəman Mübariz İbrahimovun şəhid olmasından 5 il ötür. Göstərdiyi şücaətlə bir çox gənclərdə vətənpərvərlik hissini alovlandıran Mübariz İbrahimov bu gündə sevənləri, yaxınları və hərbiçi dostları tərəfindən anılır.
5 ildir ki, Azərbaycan xalqı 18 iyunu təkcə Milli Qəhrəmanın şəhadət günü kimi deyil, müasir Azərbaycan tarixinin cəsurluq, qəhrəmanlıq, zəfər tarixi kimi qeyd edir.
Mübariz İbrahimov 1988-ci ildə Biləsuvar rayonunun Əliabad kəndində anadan olub. Əsgəri xidmətini daxili qoşunların “N” saylı hərbi hissəsinin xüsusi təyinatlı bölüyündə keçirib. Hərbi xidmətini 2007-ci ildə çavuş kimi başa vuran Mübariz bir müddət mülki işlərdə çalışsa da, 2009-cu ilə avqust ayında yenidən gizir rütbəsində xidmətə başlayıb.
O, 2010-cu il iyunun 18-də gecə təkbaşına iki ordu arasındakı 1km-lik minalanmış sahəni keçərək Ermənistan Silahlı Qüvvələrinin çox sayda əsgər və zabitini məhv edib. 5 saatlıq təkbətək qeyri-bərabər döyüşdə özü də qəhrəmancasına şəhid olub.
“5, 10, 20 il də keçsə Mübariz həmişə qəlbimizdədir. Onu biz unutmayacağıq. Mübarizi bütün Azərbaycan xalqı yaşadır, sevir. Bu ata-ana üçün böyük təskinlikdir ki, onların övladını özlərindən çox sevənlər var”, – deyə Mübariz İbrahimovun atası Ağakərim İbrahimov qeyd edib.
Mübariz İbrahimovun döyüş yolu gənclərə qəhrəmanlıq məktəbi kimi tədris edilməlidir - Biləsuvarlı gənclər onunla daim fəxr edəcəklərini deyirlər.
“Mübariz İbrahimov adı bizim üçün həm qəhrəmalıq simvoludur, həm də müasir Azərbaycan tarixinin təkrar olunmayacaq vətənpərvərlik nümunəsidir”, – deyə Biləsuvarlı gənc Ziya Məmmədzadə fikrini açıqlayıb.
Vətənin Mübariz oğlunun xatirəsini Biləsuvarda hamı əziz tutur. Doğulduğu ev daima müqəddəs ocaq kimi ziyarət edilir.(anspress)