Politoloqlar Azərbaycanda keçirilən prezident seçkiləri, Ermənistanda Serj Sarkisyanın prezidentlik müddətinin bitməsi, həmçinin Rusiya və ABŞ arasında mövcud soyuq münasibətlərin Dağlıq Qarabağ münaqişəsinin həllinə necə təsir edəcəyini şərh ediblər. AzVision.az “Deutsche Welle” nəşrinə istinadən xəbər verir ki, “Həmrəylik” Araşdırma Mərkəzinin rəhbəri, Ermənistanın sabiq milli təhlükəsizlik naziri David Şahnazaryanın fikrincə, hazırda münaqişə tərəfləri sülh sazişinin imzalanmasından çox uzaqlaşıblar. Mövcud vəziyyət yeni müharibənin mümkünlüyünün çox yüksək olduğunu göstərir. Böyük Britaniyanın “LINKS” analitik mərkəzinin direktoru Denis Sammut isə sülh danışıqlarında irəliləyişin əldə olunacağına ümid edir. Onun sözlərinə görə, bunun üçün Azərbaycan və Ermənistanın daxilində, eləcə də beynəlxalq səviyyədə müvafiq şərait mövcud olmalıdır. Tartrus universitetinin müəllimi, politoloq Andrey Makarıçevin sözlərinə görə, rəsmi Moskva münaqişə zonasında status-kvonun saxlanmasında maraqlıdır. Buna görə də o, rəsmi Bakının münaqişənin hərbi yolla həll etmək istəyinə qarşı çıxır və bu siyasətini saxlamağa çalışır. Digər tərəfdən Rusiya hakimiyyəti Ermənistanın beynəlxalq səviyyədə tanınmış ərazilərinə müdaxilə olacağı təqdirdə hərbi yardım edəcəyini bu ölkənin rəhbərliyinin diqqətinə çatdırıb. Politoloq deyib ki, Moskva, həmçinin Qərbyönlü oriyentasiyası çox güclü olan İrəvanı öz tərəfində saxlamağa çalışır. Politoloqlar hesab edirlər ki, əgər cəbhədə növbəti eskalasiya baş verərsə, o, daha genişmiqyaslı olacaq. Belə ki, 2016-ci ildə baş verən aprel döyüşlərində həm ərazicə, həm də işlənən qoşun və texnikanın sayı məhdud olsa da, növbəti müharibə daha dağıdıcı olacaq.