Yazıda əsasən bu ayın 13-də qondarma “Dağlıq Qarabağ Respublikası”nın “özünüidarə orqanları”na qanunsuz keçirilmiş seçkilərdən, Dağlıq Qarabağ münaqişəsindən, Ermənistan və Azərbaycan qoşunlarının təmas xəttində gərginliyin hökm sürməsindən bəhs olunur.

Yazıda oxucuların diqqətinə çatdırılır ki, əslində mövcud olmayan, beynəlxalq birlik tərəfindən tanınmayan qondarma “Dağlıq Qarabağ Respublikası”nda keçirilmiş seçkilərin nəticələrini önəmli beynəlxalq təşkilatlar, dünyanın nüfuzlu ölkələri qeyri-qanuni hesab ediblər. Səbəbi isə çox aydındır. Heç bir dövlət Qafqazda və Şərqi Avropada önəmli geosiyasi aktor olan Azərbaycan ilə əlaqələrini korlamaq istəmir.

Dağlıq Qarabağ münaqişəsi ilə bağlı məqamlara toxunan müəllif qeyd edir ki, münaqişə nəticəsində bir milyondan artıq azərbaycanlı qaçqın və məcburi köçkünə çevrilib. 1994-cü ildə tərəflər arasında atəşkəsə dair sənəd imzalansa da, cəbhə xəttində silahlı toqquşmaların davam etməsi nəticəsində hər iki tərəfdən xeyli insan həyatını itirməkdədir.

Cənubi Qafqazın, xüsusilə Azərbaycanın Avropa ölkələri ilə əlaqələrindən bəhs olunan yazıda vurğulanır ki, köhnə qitə sürətlə inkişaf edən və strateji baxımdan önəmli nöqtədə yerləşən bu ölkə ilə münasibətlərini həmişə yüksək səviyyədə saxlamaq niyyətindədir. Qərb ölkələri Ermənistanı Azərbaycan torpaqlarını işğal etdiyi üçün günahlandırır, lakin bu məsələni beynəlxalq səviyyədə kifayət qədər gündəmə gətirmir, qondarma “Dağlıq Qarabağ Respublikası”nda reallaşmış seçkiləri tanımamaqlarına baxmayaraq, münaqişənin həlli istiqamətində aparılan danışıqlar prosesinə kifayət qədər töhfə vermirlər.